സിയൂള്‍: ഉ.കൊറിയയെ ലക്ഷ്യമിട്ട് നീങ്ങിയ യു.എസ് പടക്കപ്പലുകളുടെ വ്യൂഹം തിരികെ യാത്ര തുടങ്ങി. ഈമാസം എട്ടിനാണ് അമേരിക്കയുടെ ഏറ്റവും വലിയ വിമാനവാഹിനിക്കപ്പലായ യു.എസ്.എസ് കാള്‍വിന്‍സണ്‍ ഉള്‍പ്പെടെയുള്ള കപ്പലുകള്‍ കൊറിയന്‍ കടലിലേക്ക് യാത്രതിരിച്ചത്. ഉത്തര കൊറിയ ആണവ മിസൈല്‍ പരീക്ഷിക്കുന്നുവെന്ന റിപ്പോര്‍ട്ടുകള്‍ക്കിടെയായിരുന്നു ഇത്. യു.എസ് പ്രസിഡന്റ് ഡൊണാള്‍ഡ് ട്രംപാണ് പടക്കപ്പലുകളെ അയക്കാന്‍ തീരുമാനിച്ചത്.
എന്നാല്‍ കഴിഞ്ഞ ദിവസം തന്നെ കപ്പല്‍വ്യൂഹം തിരികെ യാത്രതുടങ്ങിയെന്നാണ് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്യുന്നത്. ഇന്ത്യന്‍ മഹാസമുദ്രത്തിലെ സുന്ദ കടലിടുക്കിലാണ് കപ്പല്‍വ്യൂഹം ഉള്ളത്. പെര്‍ത്തിലെ പോര്‍ട്ടിലേക്കായിരുന്നു നേരത്തെ കപ്പലുകള്‍ നീങ്ങിയത്. യു.എസ് മിലിട്ടറി പസഫിക് കമാന്‍ഡന്റിന്റെ നിര്‍ദേശ പ്രകാരമാണ് കപ്പല്‍ കൊറിയന്‍ കടലിലേക്ക് തിരിച്ചിരുന്നത്. ഇപ്പോള്‍ ഉന്നത സൈനിക നിര്‍ദേശത്തെ തുടര്‍ന്ന് കപ്പല്‍പ്പട പടിഞ്ഞാറന്‍ പസഫിക് മേഖലയിലേക്ക് തിരിച്ചിരിക്കുകയാണ്.