കൊച്ചി: ജിഷ വധക്കേസ് എറണാകുളം പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റി. ഇതേത്തുടര്‍ന്ന് ഇന്നലെ റിമാന്‍ഡ് കാലാവധി അവസാനിച്ച പ്രതി അമീറിനെ പ്രിന്‍സിപ്പല്‍ സെഷന്‍സ് കോടതിയില്‍ ഹാജരാക്കി. കോടതി പ്രതിയുടെ റിമാന്‍ഡ് കാലാവധി ഈ മാസം 27വരെ നീട്ടി. രാവിലെ കുറുപ്പുംപടി മജിസ്‌ട്രേറ്റ് കോടതിയില്‍ എത്തിച്ച പ്രതിയെ മറ്റു നടപടിക്രമങ്ങള്‍ക്കു ശേഷം ജില്ലയിലെ പ്രത്യേക കോടതിയുടെ ചുമതലയുള്ള പ്രിന്‍സിപ്പല്‍ സെഷന്‍സ് കോടതിയിലേക്കു മാറ്റുകയായിരുന്നു.
ജിഷ വധക്കേസില്‍ കൊലപാതകം, ബലാത്സംഗം എന്നിവയ്ക്ക് പുറമെ ദലിത് പീഡനം എന്ന കുറ്റംകൂടി ചുമത്തിയിരിക്കുന്നതിനാലാണു കേസിന്റെ തുടര്‍ നടപടിക്രമങ്ങള്‍ പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റിയത്. ദലിത് പീഡന നിരോധന നിയമം 2016ലെ ഭേദഗതിപ്രകാരം ഇത്തരം കേസുകള്‍ പ്രത്യേക കോടതിയില്‍ നടത്തണമെന്നാണ്. സംസ്ഥാത്ത് മലപ്പുറം,പാലക്കാട്,കൊല്ലം ജില്ലകളില്‍ മാത്രമാണ് ഇത്തരം കേസുകള്‍ നടത്താനുള്ള പ്രത്യേക കോടതിയുള്ളത്. കൊച്ചയില്‍ ഇത്തരം കേസുകള്‍ വിചാരണനടത്താനുള്ള ചുമതല പ്രിന്‍സിപ്പല്‍ സെഷന്‍സ് കോടതിക്ക് നല്‍കിയിരിക്കുന്നതിനാലാണു പ്രതിയെ ഇവിടെ എത്തിച്ചത്. കേസ് സംബന്ധിച്ച് കുറുപ്പുംപടി കോടതിയില്‍ സമര്‍പ്പിച്ച എല്ലാ രേഖകളും പ്രിന്‍സിപ്പല്‍ സെഷന്‍സ് കോടതിയിലേക്ക് മാറ്റി. ജഡ്ജി എന്‍.അനില്‍കുമാറാണ് കേസ് പരിഗണിച്ച് റിമാന്‍ഡ് കാലാവധി 27 വരെ നീട്ടിയത്. തുടര്‍ന്ന് പ്രതിയെ കാക്കനാട് ജില്ലാജയിലിലേക്കു മാറ്റി. അതേസമയം പ്രതിക്ക് അസമിലെ ബന്ധുക്കളെ ഫോണിലൂടെ ബന്ധപ്പെടാന്‍ അവസരമൊരുക്കണമെന്നു പ്രതിഭാഗം അഭിഭാഷകന്‍ കോടതിയില്‍ ആവശ്യപ്പെട്ടു. എല്ലാത്തിനും നടപടിക്രമങ്ങളുണ്ടെന്നും പ്രത്യേക അപേക്ഷ നല്‍കിയാല്‍ പരിഗണിക്കാമെന്നും കോടതി അറിയിച്ചു. ഇതിനായി അപേക്ഷ ഇന്ന് സമര്‍പ്പിക്കുമെന്ന് അമീറിന്റെ അഭിഭാഷകന്‍ പി.രാജന്‍ പറഞ്ഞു. ബന്ധുക്കളെ ഫോണിലൂടെ ബന്ധപ്പെടുന്നതിന് അപേക്ഷ നല്‍കിയാല്‍ എതിര്‍ക്കില്ലെന്ന് പബ്ലിക് പ്രോസിക്യൂട്ടര്‍ പി.കെ.സജീവന്‍ മാധ്യമപ്രവര്‍ത്തകരോടു പറഞ്ഞു. എന്നാല്‍ ജയില്‍ നിയമങ്ങള്‍ക്കും ചട്ടങ്ങള്‍ക്കും വിധേയമായിട്ടായിരിക്കും ഫോണിലൂടെ ബന്ധുക്കളെ വിളിക്കാന്‍ അനുവദിക്കുക.
ഇന്ത്യയ്ക്കു പുറത്തുള്ള കോളുകള്‍ക്ക് അനുമതി നല്‍കില്ലെന്നും അദ്ദേഹം വ്യക്തമാക്കി. കേസ് പ്രത്യേക കോടതിയിലേക്ക് മാറ്റിയതിനാല്‍ കുറ്റപത്രം സമര്‍പ്പിച്ച് രണ്ടു മാസത്തിനുള്ളില്‍ കേസിന്റെ എല്ലാ നടപടിക്രമങ്ങളും അവസാനിപ്പിച്ചിരിക്കണമെന്നാണ് നിയമമെന്ന് നിയമവിദഗ്ധര്‍ ചൂണ്ടിക്കാണിക്കുന്നു.