കാഞ്ഞങ്ങാട്: പ്രസിദ്ധമായ പരപ്പ കമ്മാടം മഖാം ഉറൂസിന് ഇന്നു തുടക്കം കുറിക്കും. 24 വരെ നടക്കുന്ന ഉറൂസ് ചടങ്ങിന്റെ ഭാഗമായി മജ്‌ലിസുന്നൂര്‍, മതപ്രഭാഷണം, സാംസ്‌കാരിക കൂട്ടായ്മ എന്നിവ നടക്കും. ഇന്നു രാത്രി എട്ടിനു നടക്കുന്ന മജ്‌ലിസുന്നൂര്‍ സദസിന് മഹല്ല് ഖത്വീബ് സഹ്ല്‍ അസ്ഹരി നേതൃത്വം നല്‍കും. അലി മൗലവി ഉദ്ഘാടനം ചെയ്യും. ഉറൂസ് കമ്മിറ്റി ചെയര്‍മാന്‍ അഹമ്മദ് മൗലവി അധ്യക്ഷനാകും. സയ്യിദ് മഹ്മൂദ് സഫ്‌വാന്‍ തങ്ങള്‍ ഏഴിമല പ്രാര്‍ഥനക്കു നേതൃത്വം നല്‍കും.
നാളെ ഉച്ചക്ക് 1.30നു കമ്മാടത്ത് അബ്ദുല്‍ റഹിമാന്‍ പതാക ഉയര്‍ത്തും. 2.30നു നെരോത്ത് കുലോം ക്ഷേത്ര സ്ഥാനികര്‍ മഖാം സന്ദര്‍ശനം നടത്തും. തുടര്‍ന്നു നടക്കുന്ന സാംസ്‌കാരിക കൂട്ടായ്മ കാഞ്ഞങ്ങാട് സംയുക്ത മുസ്‌ലിം ജമാഅത്ത് പ്രസിഡന്റ് മെട്രോ മുഹമ്മദ് ഹാജി ഉദ്ഘാടനം ചെയ്യും.
കെ.പി സുള്‍ഫിക്കര്‍ അധ്യക്ഷനാകും. രാത്രി ഏഴിനു സമസ്ത പ്രസിഡന്റും കാഞ്ഞങ്ങാട് സംയുക്ത ജമാഅത്ത് ഖാസിയുമായ സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ ഉറൂസിന്റെ ഉദ്ഘാടനം നിര്‍വഹിക്കും.
ഹനീഫ് ഹുദവി ദേലംപാടി മുഖ്യപ്രഭാഷണം നടത്തും. ഹംസ മുസ്‌ലിയാര്‍ മൂര്യാട് പ്രാര്‍ഥനക്ക് നേതൃത്വം നല്‍കും. തുടര്‍ന്നുള്ള ദിവസങ്ങളില്‍ പ്രമുഖ പണ്ഡിതരും സയ്യിദുമാരും പ്രഭാഷണവും പ്രാര്‍ഥനയും നടത്തും.
വാര്‍ത്താസമ്മേളനത്തില്‍ കെ.പി അബ്ദുല്‍ റഹിമാന്‍, നാസര്‍ കക്കാട്, ശരീഫ് കമ്മാടം എന്നിവര്‍ സംബന്ധിച്ചു.