കുറ്റ്യാടി: പ്ലസ് ടു വിദ്യാര്‍ഥിയെ അധ്യാപകര്‍ ചേര്‍ന്ന് ക്രൂരമായി മര്‍ദിച്ചതായി പരാതി.
കുറ്റ്യാടി ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥിയും എം.എസ്.എഫ് സ്‌കൂള്‍ ചെയര്‍മാനുമായ മൂന്നാംകൈ നിടിയപൊയില്‍ മുഹമ്മദ് നാജിദിനാണ് മര്‍ദനമേറ്റത്. വ്യാഴാഴ്ച ഉച്ചയോടെയാണ് സംഭവം. ഏതാനും ദിവസങ്ങള്‍ക്ക് മുന്‍പ് നടന്ന സെന്റ്ഓഫ് പരിപാടിക്കിടെ നാജിദിന്റെ ഫോണ്‍ സ്‌കൂളില്‍ പിടിക്കപ്പെട്ടിരുന്നു.
ഒടുവില്‍ വ്യാഴാഴ്ച തിരിച്ചു നല്‍കുമെന്നതിന്റെ അടിസ്ഥാനത്തില്‍ ഫോണ്‍ വാങ്ങാന്‍ ഓഫിസിലേക്ക് പോകവെ ആണ് ഹൈസ്‌കൂളിലെ ഏതാനും അധ്യാപകര്‍ ചേര്‍ന്ന് നാജിദിനെ മര്‍ദിച്ചത്. മര്‍ദനത്തില്‍ കഴുത്തിനും നെഞ്ചത്തും കാലിലും സാരമായ പരുക്കേറ്റ നിലയില്‍ കുറ്റ്യാടി ഗവ. താലൂക്കാശുപത്രിയില്‍ പ്രവേശിപ്പിച്ചു.
ഹയര്‍സെക്കന്‍ഡറി ഓഫിസിലേക്ക് നിലവില്‍ ഹൈസ്‌കൂള്‍ വരാന്ത വഴിയാണ് പോകേണ്ടത്. ഇതേതുടര്‍ന്ന് ഇതുവഴിയാണ് നാജിദ് പോയത്. സംഭവസമയം എസ്.എസ്.എല്‍.സി പരീക്ഷ നടക്കുന്നതിനാല്‍ നിയമം പാലിച്ചില്ലെന്നും മറ്റും പറഞ്ഞു മര്‍ദിക്കുകയായിരുന്നുവെന്ന് നാജിദ് പറഞ്ഞു. ക്രൂരമായ മര്‍ദനമേറ്റതിനാല്‍ ബോധം വരെ നഷ്ടപ്പെട്ടു. ഇതിനിടെ ആരോ മുഖത്ത് വെള്ളം കുടഞ്ഞപ്പോഴാണ് ബോധം വന്നത്.
ആ സമയം തന്നെ സ്‌കൂള്‍ വരാന്തയിലൂടെ വലിച്ചു കൊണ്ടുപോകുകയായിരുന്നുവെന്നും നാജിദ് പറഞ്ഞു. എന്നാല്‍ സന്ദര്‍ഭം ഉപയോഗപ്പെടുത്തി തന്നോടുള്ള മുന്‍വൈരാഗ്യം തീര്‍ക്കുകയായിരുന്നു മര്‍ദനത്തിന്റെ പിന്നിലെന്ന് നാജിദ് പറഞ്ഞു. സംഭവത്തില്‍ മാതാവ് കുറ്റ്യാടി പൊലിസില്‍ പരാതി നല്‍കി.
മകനെ യാതൊരു കാരണവുമില്ലാതെ ക്രൂരമായി മര്‍ദിച്ച അധ്യാപകര്‍ക്കെതിരേ നടപടി സ്വീകരിക്കണമെന്ന് മാതാവ് നിടിയപൊയില്‍ സീനത്ത് വാര്‍ത്താസമ്മേനത്തില്‍ ആവശ്യപ്പെട്ടു.