പേരാമ്പ്ര: യു.ഡി.എഫ് ലോക്‌സഭാ മണ്ഡലം സ്ഥാനാര്‍ഥി കെ. മുരളീധരന്‍ പേരാമ്പ്രയില്‍ നടത്തിയ റോഡ്‌ഷോ പ്രവര്‍ത്തകര്‍ക്ക് ആവേശമായി.
നൂറുകണക്കിന് പ്രവര്‍ത്തകരുടെ അകമ്പടിയോടെ തുറന്ന വാഹനത്തിലാണ് സ്ഥാനാര്‍ഥി എത്തിയത്. റോഡിനിരുവശവും വന്‍ജനാവലിയാണ് സ്ഥാനാര്‍ഥിയെ കാണാനായി കാത്തുനിന്നത്. വോട്ടര്‍മാരെ കൈവീശി അഭിവാദ്യം ചെയ്തും സ്‌നേഹാഭിവാദ്യങ്ങള്‍ ഏറ്റുവാങ്ങിയുമാണ് സ്ഥാനാര്‍ഥി കടന്നുനീങ്ങിയത്. സ്ഥാനാര്‍ഥിയുടെ ചിത്രം പതിച്ച പ്ലക്കാര്‍ഡുകള്‍ ഉയര്‍ത്തിയാണ് പ്രവര്‍ത്തകര്‍ റോഡ് ഷോയില്‍ പങ്കെടുത്തത്.
യതീംഖാന പരിസരത്തുനിന്ന് ആരംഭിച്ച റോഡ്‌ഷോ ടി.ബി പരിസരത്ത് സമാപിച്ചു. യു.ഡി.എഫ് നേതാക്കളായ എസ്.കെ അസ്സൈയിനാര്‍, എസ്.പി കുഞ്ഞമ്മദ്, സി.പി.എ അസീസ്, സത്യന്‍ കടിയങ്ങാട്, പി.ജെ തോമസ്, മുനീര്‍ എരവത്ത്, വി.സി ചാണ്ടി, രാജന്‍ മരുതേരി, ബേബി കാപ്പുകാട്ടില്‍, ടി.കെ ഇബ്രാഹിം, പി.പി രാമകൃഷ്ണന്‍, എം.കെ അബ്ദുറഹ്മാന്‍, പുതുക്കുടി അബ്ദുറഹ്മാന്‍, എം.കെ.സി കുട്ട്യാലി, രാജന്‍ വര്‍ക്കി, പി.കെ രാഗേഷ്, കെ.പി വേണുഗോപാല്‍, കെ.കെ വിനോദന്‍, പി. വാസു എന്നിവര്‍ നേതൃത്വം നല്‍കി.