ചങ്ങനാശേരി: പുതിയ റേഷന്‍ കാര്‍ഡിന് അപേക്ഷിക്കുന്നവരില്‍ മാസവരുമാനം 25000 രൂപയില്‍ കൂടുതലുള്ളവര്‍ വരുമാന സര്‍ട്ടിഫിക്കറ്റ് ഹാജരാക്കേണ്ടതില്ലെന്ന് സിവില്‍ സപ്ലൈസ് ഡയറക്ടര്‍ ഉത്തരവിട്ടതായി റേഷന്‍ ഡീലേഴ്‌സ് അസോസിയേഷന്‍ ദേശീയ ജനറല്‍ സെക്രട്ടറി ബേബിച്ചന്‍ മുക്കാടന്‍ അറിയിച്ചു.
സര്‍ക്കാര്‍ ഉദ്യോഗസ്ഥര്‍, സര്‍വ്വീസ് പെന്‍ഷന്‍കാര്‍, ആദായ നികുതി അടയ്ക്കുന്നവര്‍, ഒരേക്കറില്‍ കൂടുതല്‍ ഭൂമിയുള്ളവര്‍, 1000 ചതുരശ്രയടിയില്‍ കൂടുതല്‍ വിസ്തീര്‍ണ്ണമുള്ള വീടുള്ളവര്‍, നാലുചക്ര വാഹനം ഇവയില്‍ ഏതെങ്കിലും ഉള്ളവര്‍ വരുമാന സര്‍ട്ടിഫിക്കറ്റ് ഹാജരാക്കേണ്ടതില്ല. ഇവര്‍ക്ക് വെള്ള കാര്‍ഡാണ് ലഭിക്കുക.സംസ്ഥാനത്ത് ഒരു റേഷന്‍ കാര്‍ഡിലും പേരില്ലാത്തവര്‍ മാത്രം ജനപ്രതിനിധികളുടെ സാക്ഷിപത്രം നല്‍കിയാല്‍ മതിയാകും.
എന്നാല്‍ 25000 രൂപയില്‍ താഴെ വരുമാനുള്ള കുടുംബങ്ങള്‍ മുന്‍ഗണനാ വിഭാഗത്തിലേക്ക് പരിഗണിക്കേണ്ടതിനാല്‍ വരുമാന സര്‍ട്ടിഫിക്കറ്റ് ഹാജരാക്കണമെന്നും ഡയറക്ടറുടെ ഉത്തരവില്‍ പറയുന്നു.
റേഷന്‍ കടകളെ മിനി ബാങ്കുകളാക്കി മാറ്റാനും, എ.റ്റി.എം. വഴി പണമിടപാടുകള്‍ നടത്താനും തീരുമാനമായി. ആദ്യഘട്ടത്തില്‍ 100 റേഷന്‍ കടകളിലൂടെ സേവനം ലഭ്യമാക്കാന്‍ കാനറാ ബാങ്കുമായി സര്‍ക്കാര്‍ നടത്തിയ ചര്‍ച്ചയില്‍ ധാരണയായി. 100 മുതല്‍ 200 വരെ ഇടപാടുകള്‍ നടത്തുന്ന റേഷന്‍ കടകള്‍ക്ക് മാസം 2500 രൂപ പ്രതിഫലം ലഭിക്കുമെന്നും ബേബിച്ചന്‍ മുക്കാടന്‍ അറിയിച്ചു.