പാറശാല: മാല മോഷ്ടാക്കളുടെ കുത്തേറ്റ് സ്‌കൂള്‍ വിദ്യാര്‍ഥിനിയുടെ കൈയ്ക്ക് പരുക്ക്. സൂര്യ കോട് സ്വദേശിയായ സെല്‍വത്തിന്റെ മകള്‍ ശരണ്യ (14) യെയാണു മാലമോഷ്ടാക്കള്‍ കുത്തിപ്പരുക്കേല്‍പ്പിച്ചത്. ഇന്നലെ രാവിലെയായിരുന്നു സംഭവം.
കളിയില്‍ സ്വകാര്യ സ്‌കൂളിലെ ഒന്‍പതാം ക്ലാസ് വിദ്യാര്‍ഥിനിയായ ശരണ്യ രാവിലെ വീട്ടില്‍നിന്ന് സ്‌കൂളിലേക്ക് പോകുമ്പോള്‍ കൊല്ലാറയില്‍വച്ച് ബൈക്കില്‍ ഹെല്‍മറ്റ് ധരിച്ചെത്തിയ യുവാക്കള്‍ മാല പൊട്ടിക്കാന്‍ ശ്രമിക്കുകയായിരുന്നു. ഇതു തടയാനുള്ള ശ്രമത്തിനിടെ കത്തികൊണ്ട് വിദ്യാര്‍ഥിനിയുടെ കൈയില്‍ കുത്തിപ്പരുക്കേല്‍പ്പിച്ചു.
വിദ്യാര്‍ഥിനിയുടെ നിലവിളി കേട്ട് നാട്ടുകാര്‍ ഓടിക്കൂടിയപ്പോഴേക്കും മോഷ്ടാക്കള്‍ ബൈക്കില്‍ രക്ഷപ്പെട്ടുവെന്ന് പൊലിസിനു നല്‍കിയ പരാതിയില്‍ പറയുന്നു. കുലശേഖരം പൊലിസ് കേസെടുത്തു.