കല്ലമ്പലം: വീടിനുള്ളില്‍ ഉപയോഗത്തിലിരുന്ന ഫ്രിഡ്ജ് പൊട്ടിത്തെറിച്ച് വന്‍ നാശനഷ്ടം. സംഭവസമയം വീട്ടില്‍ ആളില്ലാത്തതിനാല്‍ വന്‍ദുരന്തം ഒഴിവായി. നാവായിക്കുളം കപ്പാംവിള പാറച്ചേരി വീട്ടില്‍ കഴിഞ്ഞദിവസം രാത്രിയായിരുന്നു സംഭവം. വീട്ടുടമസ്ഥനായ അബ്ദുല്‍ വാഹിദും ഭാര്യ സബീനയും മകളുടെ വീട്ടിലായിരുന്നു.
ഇന്നലെ രാവിലെ തിരിച്ചെത്തിയപ്പോഴാണ് ഫ്രിഡ്ജ് പൊട്ടിത്തെറിച്ചത് അറിയുന്നത്.
സമീപത്തുണ്ടായിരുന്ന ഇന്‍വെര്‍ട്ടര്‍, സ്റ്റബ്‌ലെയ്‌സര്‍, ഫാന്‍, ലൈറ്റുകള്‍, വയര്‍, സ്വിച്ച് ബോര്‍ഡുകള്‍, മിക്‌സി, പാത്രങ്ങള്‍ എന്നിവയും കത്തിനശിച്ചു. അടുക്കളയുടെ സീലിങ് അടര്‍ന്നുവീണു. ഫ്‌ളോര്‍ ടൈലുകള്‍ പൊട്ടിച്ചിതറി. വീടിനകം മുഴുവന്‍ കരിയും പുകയും നിറഞ്ഞിരുന്നു. കല്ലമ്പലം പൊലിസ് സ്ഥലത്തെത്തി പരിശോധന നടത്തി.