എം.എം അന്‍സാര്‍

കഴക്കൂട്ടം: കേരള സര്‍വകലാശാല യുവജനോത്സവത്തിന്റെ നാലാം ദിവസമായ ഇന്നലെ തിരുവനന്തപുരം യൂനിവേഴ്‌സിറ്റി കോളജും തിരുവനന്തപുരം മാര്‍ ഇവാനിയോസ് കോളജും ഒപ്പത്തിനൊപ്പം മുന്നേറുന്നു.
ഇന്നലെ ഏഴു വേദികളിലായി 22 മത്സരങ്ങളാണ് അരങ്ങേറിയത്. രാത്രി വൈകിയും പല മത്സരങ്ങളും അവസാനിച്ചിട്ടില്ല. കഴിഞ്ഞദിവസങ്ങളിലേതു പോലെ മത്സരങ്ങള്‍ കൃത്യസമയത്ത് തുടങ്ങാന്‍ സാധിച്ചില്ല. നങ്ങ്യാര്‍കൂത്ത്, ഓട്ടന്‍തുള്ളല്‍, വഞ്ചിപ്പാട്ട്, നാടന്‍പാട്ട് എന്നിവയായിരുന്നു ഇന്നലത്തെ പ്രധാന മത്സരങ്ങള്‍.
135 പോയിന്റോടെ തിരുവനന്തപുരം യൂനിവേഴ്‌സിറ്റി കോളജും നാലാഞ്ചിറ മാര്‍ ഇവാനിയസ് കോളജും ഒപ്പത്തിനൊപ്പമാണിപ്പോള്‍. 109 പോയിന്റുമായി ഗവ. വുമണ്‍സ് കോളജ് വഴുതക്കാട് രണ്ടാം സ്ഥാനത്തുണ്ട്. 79 പോയിന്റോടെ ആതിഥേയരായ കാര്യവട്ടം യൂനിവേഴ്‌സിറ്റി കാംപസ് മൂന്നാം സ്ഥാനത്തുമാണ്.
യുവജനോത്സവത്തിന്റെ അവസാന ദിവസമായ ഇന്നു വൈകിട്ട് നാലിന് നടക്കുന്ന സമാപന സമ്മേളനത്തില്‍ മുഖ്യമന്ത്രി പിണറായി വിജയന്‍, മന്ത്രി കടകംപള്ളി സുരേന്ദ്രന്‍ എന്നിവര്‍ പങ്കെടുക്കും.