കൊച്ചി: മോട്ടോര്‍ സ്‌പോര്‍ട്‌സ് പ്രേമികളുടെ ഹരമായ പോപ്പുലര്‍ കാര്‍ റാലി ഒരിടവേളക്ക് ശേഷം വീണ്ടും കൊച്ചിയില്‍. മെയ്13 ന് മറൈന്‍ ഡ്രൈവ് മൈതാനത്ത് മത്സരത്തിന് തുടക്കമാകും.
14ന് സമാപനവും ഇവിടെ നടക്കും. കൊച്ചിയില്‍ നിന്ന് മൂന്നാറിലേക്കും തിരികെ കൊച്ചിയിലേക്കുമാണ് റാലി. കുറ്റൂക്കാരന്‍ ഗ്രൂപ്പിലെ പോപ്പുലര്‍ വെഹിക്കിള്‍സ് ആന്‍ഡ് സര്‍വിസസ് നടത്തുന്ന റാലി സംഘടിപ്പിക്കുന്നത് സതേണ്‍ അഡ്വഞ്ചേഴ്‌സ് ആന്‍ഡ് മോട്ടോര്‍ സ്‌പോര്‍ട്‌സ് (സാം) ആണ്. ഇക്കൊല്ലം നാലുചക്ര വാഹനങ്ങള്‍ക്കാണ് മത്സരത്തില്‍ പങ്കെടുക്കാന്‍ അവസരം.
പതിനാലിന് മറൈന്‍ഡ്രൈവിലാണ് സമ്മാനദാനം. റാലിക്കായി തീം സോംഗ് ഒരുക്കിയിരിക്കുന്നത് കുറ്റുക്കാരന്‍ ഗ്രൂപ്പിന്റെ ഭാഗമായ ബ്ലൂടിംബര്‍ മ്യൂസിക് എല്‍.എല്‍.പിയാണ്.
അന്തരിച്ച വ്യവസായി കെ.പി പോളിന്റെ സംരംഭക മികവില്‍ 1940ല്‍ സ്ഥാപിതമായ പോപ്പുലര്‍ ഗ്രൂപ്പിന്റെ നേതൃത്വത്തില്‍ ആരംഭിച്ച കാര്‍ റാലി 21 വര്‍ഷത്തോളം നടന്നിരുന്നു. 15 മുതല്‍ 20 വര്‍ഷം വരെ അനുഭവസമ്പത്തുള്ളവരും റാലിയോട് കടുത്ത അഭിനിവേശമുള്ളവരും ചേര്‍ന്നാണ് സാമിന് രൂപം നല്‍കിയത്.