ബംഗളൂരു: മലയാളി താരം കെ.ടി ഇര്‍ഫാന്റെ ഒളിംപിക്‌സ് മോഹങ്ങള്‍ക്കു തിരിച്ചടി. ഇരുപത് കിലോമീറ്റര്‍ നടത്തത്തില്‍ ഒളിംപിക് യോഗ്യത നേടിയെങ്കിലും മികച്ച പ്രകടനം കാഴ്ചവച്ച ആദ്യ മൂന്നു പേര്‍ക്കു മാത്രമേ ഒളിംപിക് ടീമില്‍ ഇടംനേടാന്‍ സാധിക്കുകയുള്ളു. ഇര്‍ഫാനടക്കം ആറു പേര്‍ക്കാണ് ഇന്ത്യയില്‍ നിന്നു 20 കിലോമീറ്റര്‍ നടത്തത്തില്‍ യോഗ്യത സ്വന്തമായത്. ഇതില്‍ നിന്നു മൂന്നു പേരെ മാത്രമേ ടീമില്‍ ഉള്‍പ്പെടുത്താന്‍ അനുവാദമുള്ളു. മികച്ച പ്രകടനം പുറത്തെടുത്ത മനീഷ് സിങ് റാവത്ത്, ഗുര്‍മിത് സിങ്, കെ ഗണപതി എന്നിവരാണ് ഒളിംപിക്‌സില്‍ ഇന്ത്യയെ പ്രതിനിധീകരിക്കുന്നത്.
നേരത്തെ ജയ്പൂരില്‍ നടന്ന ദേശീയ റെയ്‌സ് വാക്ക് ചാംപ്യന്‍ഷിപ്പില്‍ ഒരു മണിക്കൂര്‍ 22 മിനുട്ട് 14 സെക്കന്‍ഡില്‍ ഫിനിഷ് ചെയ്താണ് ഇര്‍ഫാന്‍ ഒളിംപിക് യോഗ്യത നേടിയത്. യോഗ്യതാ മാര്‍ക്ക് ഒരു മണിക്കൂറും 24 മിനുട്ടുമായിരുന്നു.
കാല്‍മുട്ടിലെ പരുക്കു മൂലം കഴിഞ്ഞ ഒന്നര വര്‍ഷമായി ഇര്‍ഫാന്‍ മത്സര രംഗത്തു നിന്നു വിട്ടുനില്‍ക്കുകയായിരുന്നു. 2012 ഒളിംപിക്‌സില്‍ 20 കിലോമീറ്റര്‍ നടത്ത മത്സരത്തില്‍ ഇന്ത്യയെ പ്രതിനിധീകരിച്ച് പുതിയ ദേശീയ റെക്കോര്‍ഡ് സ്ഥാപിക്കാന്‍ ഇര്‍ഫാന് സാധിച്ചിരുന്നു.