ബംഗളൂരു: റിയോയില്‍ മലയാളി താരം ടിന്റു ലൂക്കയ്ക്ക് മെഡല്‍ സാധ്യത ഉണ്ടെന്ന് ഇന്ത്യയുടെ സ്പ്രിന്റ് ഇതിഹാസം പി.ടി ഉഷ. മികച്ച പ്രകടനമാണ് ടിന്റു കാഴ്ച്ചവയ്ക്കുന്നത്. ടിന്റുവിനെ കൂടാതെ ലളിത ബാബര്‍, സുധ സിങ് എന്നിവര്‍ക്കും മെഡല്‍ നേടാനുള്ള സാധ്യതയുണ്ടെന്നു ഉഷ പറഞ്ഞു. ഒളിംപിക്‌സ് എപ്പോഴും അനിശ്ചിതാവസ്ഥയുടെ മത്സരമാണ്. അവിടെ ആര്‍ക്ക് മെഡല്‍ നേടാനാകുമെന്ന് പ്രവചിക്കാനാവില്ല. പക്ഷേ ടിന്റു, ലളിത, സുധ എന്നിവര്‍ മികച്ച ഫോമിലാണ്. ഇവര്‍ക്ക് ഫൈനലിലേക്ക് മുന്നേറാന്‍ സാധിക്കും. മെഡല്‍ ലക്ഷ്യമിട്ട് ഇവര്‍ പ്രകടനം ഇനിയും മെച്ചപ്പെടുത്തേണ്ടതുണ്ടെന്നും ഉഷ പറഞ്ഞു.
100 മീറ്റര്‍, 3000 മീറ്റര്‍ സ്റ്റീപ്പില്‍ ചേസ് എന്നിവയിലാണ് ടിന്റുവും സുധയും ലളിതയും യോഗ്യത നേടിയത്. അതേസമയം ദ്യുതി ചന്ദിനെയും ഉഷ അഭിനന്ദിച്ചു. 100 മീറ്ററിന് യോഗ്യത നേടുക എന്നത് അഭിനന്ദനാര്‍ഹമാണ്. ദ്യുതി ഫിനിഷ് ചെയ്ത സമയം വളരെ പ്രധാനപ്പെട്ടതാണ്. റിയോയില്‍ ദ്യുതിക്ക് അദ്ഭുത പ്രകടനം നടത്താനാവുമെന്നും ഉഷ കൂട്ടിച്ചേര്‍ത്തു.