ന്യൂഡല്‍ഹി: ട്രെയിനുകളില്‍ ലഭിക്കുന്ന ഭക്ഷണം പാകം ചെയ്യുന്നത് ഇനി എല്ലാവര്‍ക്കും ലൈവായി കാണാം. ഐ.ആര്‍.സി.ടി.സിയുടെ പുതിയ ലൈവ് സ്ട്രീമിങ് സംവിധാനത്തിലൂടെയാണ് ഭക്ഷണം പാകം ചെയ്യുന്നത് തത്സമയം സംപ്രേക്ഷണം ചെയ്യുന്നത്. റെയില്‍വേ ബോര്‍ഡ് ചെയര്‍മാന്‍ അശ്വിനി ലോഹാനി പദ്ധതി ഉദ്ഘാടനം ചെയ്തു.

നോയിഡയിലെ ഐ.ആര്‍.സി.ടി.സി സെന്‍ട്രല്‍ കിച്ചണില്‍ നിന്നുള്ള തത്സമയ ദൃശ്യങ്ങള്‍ വെബ്‌സൈറ്റില്‍ തുറന്നുകൊണ്ടായിരുന്നു അശ്വാനി ലോഹാനി ലൈവ് സ്ട്രീമിങ് സംവിധാനം ഉദ്ഘാടനം ചെയ്തത്.

റെയില്‍വേ മന്ത്രി പീയുഷ് ഗോയലാണ് ഈ ആശയം മുന്നോട്ടുവെച്ചത്. ട്രെയിനുകളില്‍ ലഭിക്കുന്ന ഭക്ഷണത്തെ സംബന്ധിച്ച് വ്യാപക പരാതികള്‍ ഉയര്‍ന്ന സാഹചര്യമാണ് റെയില്‍വേയെ ഇത്തരമൊരു സംവിധാനം കൊണ്ടുവരാന്‍ പ്രേരിപ്പിച്ചത്.

ഐ.ആര്‍.സി.ടി.സിയുടെ മേല്‍നോട്ടത്തിലുള്ള വിവിധ പാചകപ്പുരകളില്‍ നിന്നാണ് ലൈവ് സ്ട്രീമിങ് സംവിധാനം ഒരുക്കിയിരിക്കുന്നത്. ഐ.ആര്‍.സി.ടി.സി വെബ്‌സൈറ്റിലെ പ്രത്യേക ലിങ്കായ www.irctc.co.in ല്‍ ക്ലിക്ക് ചെയ്താല്‍ ഭക്ഷണം പാകം ചെയ്യുന്നതിന്റെ തത്സമയ ദൃശ്യങ്ങള്‍ ലഭിക്കും.