കാസര്‍കോട്: വരള്‍ച്ചാ പ്രതിരോധ പ്രവര്‍ത്തനങ്ങളുടെ ഭാഗമായി ജില്ലയില്‍ ആവശ്യമുള്ള എല്ലാ പ്രദേശങ്ങളിലും ഏപ്രില്‍ ഒന്നു മുതല്‍ കുടിവെള്ള വിതരണം നടത്തും. ഉഷ്ണ തരംഗം, സൂര്യാതപം, സൂര്യാഘാതം എന്നിവയുടെ മുന്‍കരുതല്‍ നടപടികളും കുടിവെള്ള വിതരണ അവലോകനവുമായി ബന്ധപ്പെട്ട് കലക്ടറുടെ നേതൃത്വത്തില്‍ ചേര്‍ന്ന യോഗത്തിലാണ് തദ്ദേശ സ്വയംഭരണ സ്ഥാപനങ്ങള്‍ക്ക് നിര്‍ദേശം നല്‍കിയത്.
വിതരണം ചെയ്യാനുപയോഗിക്കുന്ന സ്രോതസുകളില്‍നിന്നുള്ള കുടിവെള്ളം പരിശോധന നടത്തി ഗുണമേന്മ ഉറപ്പു വരുത്തണം. ജി.പി.എസ് ഘടിപ്പിച്ച വാഹനത്തില്‍ കിയോസ്‌കുകള്‍ വഴിയും കൂടാതെ കുടിവെള്ള ക്ഷാമം നേരിടുന്ന മേഖലകളില്‍ ടാങ്കര്‍ ലോറികളിലും കുടിവെള്ളം വിതരണം ചെയ്യുന്നതിന് ജില്ലയിലുടനീളം ഒരു ഏകൃത നിരക്ക് തീരുമാനിക്കുന്നതിന് ബന്ധപ്പെട്ട പഞ്ചായത്തുകളുമായി കൂടിയാലോചിച്ച് തീരുമാനമെടുക്കും.
തദ്ദേശ സ്വയംഭരണ സ്ഥാപനങ്ങള്‍ തനത്പ്ലാന്‍ ഫണ്ടില്‍ നിന്ന് കുടിവെള്ള വിതരണത്തിനുള്ള തുക കണ്ടെത്തണം. കൂടുതല്‍ തുക ആവശ്യമായി വരുകയാണെങ്കില്‍ സര്‍ക്കാരില്‍നിന്ന് ലഭ്യമാക്കുന്നതിനുള്ള നടപടി സ്വീകരിക്കും. കുടിവെള്ളം ഉപയോഗിച്ച് ഉല്‍പാദനം നടത്തുന്ന ജില്ലയിലെ എല്ലാ വ്യവസായങ്ങളുടെയും ജല ഉപഭോഗം നിയന്ത്രിക്കേണ്ടതുണ്ടോ എന്നതില്‍ റിപോര്‍ട്ട് സമര്‍പ്പിക്കാന്‍ ഭൂഗര്‍ഭ ജലവകുപ്പിനെ ചുമതലപ്പെടുത്തി.
കുടിവെള്ളത്തിന്റെ അപര്യാപ്തത മൂലം വന്യമൃഗങ്ങള്‍ നാട്ടിലിറങ്ങാനുള്ള സാധ്യതയുള്ളതിനാല്‍ ആവശ്യമായ മുന്‍കരുതലുകള്‍ സ്വീകരിക്കാന്‍ വനംവകുപ്പിനോട് നിര്‍ദേശിച്ചു.
വരള്‍ച്ചാ സാഹചര്യം നേരിടുന്നതിന് തദ്ദേശ സ്വയംഭരണ സ്ഥാപനങ്ങളുടെ പ്രവര്‍ത്തനങ്ങളെ ഏകോപിപ്പിക്കുന്നതിനായി ഓരോ താലൂക്കിന്റെയും ചുമതല ഡെപ്യൂട്ടി കലക്ടര്‍മാര്‍ക്ക് നല്‍കിയിട്ടുണ്ട്.