കണ്ണൂര്‍: പാലയാട് കാംപസിലെ ഹെല്‍ത്ത് സയന്‍സ് കോഴ്‌സ് നിലനിര്‍ത്തണമെന്ന് ആവശ്യപ്പെട്ട് പാലയാട് കാംപസ് യൂനിയന്റെ ആഭിമുഖ്യത്തില്‍ വിദ്യാര്‍ഥികള്‍ താവക്കര സര്‍വകലാശാലാ ആസ്ഥാനത്തേക്കു മാര്‍ച്ച് നടത്തി. ആരോഗ്യ സര്‍വകലാശാല രൂപീകരിച്ചതോടെയാണു ഹെല്‍ത്ത് സയന്‍സ് വിഭാഗം നിര്‍ത്തുന്നതിനു കണ്ണൂര്‍ സര്‍വകലാശാല തീരുമാനിച്ചത്. കോഴ്‌സുകള്‍ നിര്‍ത്തണമെന്ന് ആവശ്യപ്പെട്ട് ആരോഗ്യ സര്‍വകലാശാലാ കണ്ണൂര്‍ സര്‍വകലാശാലയ്ക്കു കത്ത് നല്‍കുകയും ചെയ്തിരുന്നു. എന്നാല്‍ കേരളത്തില്‍ റെഗുലര്‍ കോഴ്‌സായി ഹെല്‍ത്ത് സയന്‍സ് നടത്തുന്ന ഏക സര്‍വകലാശാലയെന്ന നിലയില്‍ കോഴ്‌സുകള്‍ നിലനിര്‍ത്തണമെന്നാണു വിദ്യാര്‍ഥികളുടെ ആവശ്യം. സര്‍വകലാശാലാ വൈസ് ചാന്‍സലറുടെ ചുമതലയുള്ള എം.ജി സര്‍വകലാശാല വി.സി ഡോ. ബാബു ആന്റോയുടെ സാന്നിധ്യത്തില്‍ ചര്‍ച്ച നടത്താമെന്ന ഉറപ്പില്‍ സമരം അവസാനിപ്പിച്ചു. എസ്.എഫ്.ഐ സംസ്ഥാന സെക്രട്ടറി എം. വിജിന്‍ ഉദ്ഘാടനം ചെയ്തു. ജില്ലാ സെക്രട്ടറി മുഹമ്മദ് സിറാജ് അധ്യക്ഷനായി.