തളിപ്പറമ്പ്: സിനിമാ തിയേറ്ററില്‍ നിന്നു വീണു കിട്ടിയ പഴ്‌സ് കൈക്കലാക്കിയ പൊലിസുകാരനെതിരേ നടപടിക്കു സാധ്യത. കഴിഞ്ഞ ദിവസം രാത്രി തളിപ്പറമ്പ് ക്ലാസിക് തിയേറ്ററില്‍ സിനിമ കാണാനെത്തിയ ഒരാളുടെ പേഴ്‌സ് നഷ്ടപ്പെട്ടിരുന്നു. തിരച്ചില്‍ നടത്തിയെങ്കിലും കണ്ടെത്താനായില്ല. ഒടുവില്‍ തിയേറ്ററിനകത്തെ സി.സി.ടി.വി കാമറ ഉള്‍പ്പെടെ പരിശോധിച്ചപ്പോഴാണ് വീണുകിടന്ന പഴ്‌സ് പൊലിസുകാരന്‍ എടുത്ത് പോക്കറ്റിലിടുന്നത് കണ്ടത്. പഴ്‌സ് നഷ്ടപ്പെട്ട വിവരം സിനിമക്കെത്തിയ തളിപ്പറമ്പ് സ്റ്റേഷനിലെ ഈ പൊലിസുകാരനേയും അറിയിച്ചിരുന്നു. എന്നാല്‍ സി.സി.ടി.വി ദൃശ്യം കണ്ടതിനു ശേഷം പൊലിസുകാരനെ ഫോണ്‍ചെയ്ത് അന്വേഷിച്ചപ്പോള്‍ തനിക്കറിയില്ലെന്നായിരുന്നു മറുപടി. സി.സി.ടി.വി ദൃശ്യത്തിലുണ്ടെന്ന് പറഞ്ഞപ്പോഴാണ് ഇയാള്‍ പഴ്‌സ് തിരിച്ചു നല്‍കാന്‍ തയാറായത്. പൊലിസുകാരനെതിരേ നവമാധ്യമങ്ങളില്‍ വ്യാപക പ്രചാരണം നടന്നത് ശ്രദ്ധയില്‍പെട്ട എസ്.പി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ തളിപ്പറമ്പ് ഡിവൈ.എസ്.പിയോട് ആവശ്യപ്പെട്ടിരുന്നു. റിപ്പോര്‍ട്ടിന്റെ അടിസ്ഥാനത്തില്‍ ഇന്നു തന്നെ പൊലിസുകാരനെതിരേ നടപടി ഉണ്ടായേക്കും.