കോട്ടയം: ചങ്ങനാശേരി ഫസ്റ്റ്ക്ലാസ് മജിസ്‌ട്രേറ്റ് കോടതിയില്‍ നല്‍കിയ രഹസ്യ മൊഴിയിലും ബിഷപ്പ് പീഡിപ്പിച്ചതായി കന്യാസ്ത്രീ ആവര്‍ത്തിച്ചു. ജലന്ധര്‍ ബിഷപ്പ് ഫ്രാങ്കോ മുളയ്ക്കല്‍ പീഡിപ്പിച്ചെന്ന പരാതിയില്‍ കുറവിലങ്ങാട് മഠത്തിലെ കന്യാസ്ത്രീയാണ് രഹസ്യമൊഴി നല്‍കിയത്.
നാലുമണിക്കൂറോളം സമയമെടുത്താണ് കന്യാസ്ത്രീയുടെ മൊഴി രേഖപ്പെടുത്തിയത്. ഇന്നലെ ഉച്ചയ്ക്ക് രണ്ടരയ്ക്ക് ആരംഭിച്ച മൊഴിയെടുപ്പ് വൈകിട്ട് ആറരവരെ നീണ്ടു.
ഫോറന്‍സിക് സംഘം കുറവിലങ്ങാട്ടെ മഠത്തിലെത്തി സിസിടിവിയും സന്ദര്‍ശന രജിസ്റ്ററും പരിശോധിച്ച് വിവരങ്ങള്‍ ശേഖരിച്ചു. പീഡനക്കേസിലെ പ്രാഥമിക തെളിവെടുപ്പ് പൂര്‍ത്തിയായ സാഹചര്യത്തില്‍ ബിഷപ്പിനെ ചോദ്യംചെയ്യാന്‍ വിളിച്ചുവരുത്തിയേക്കും. വൈക്കം ഡിവൈ.എസ്.പിയുടെ നേതൃത്വത്തിലാണ് അന്വേഷണം.