സ്വന്തം ലേഖകന്‍
തിരുവനന്തപുരം: വിവിധ ആവശ്യങ്ങള്‍ക്കായി പൊതു ജനങ്ങള്‍ കൂടുതലായി എത്തുന്ന സര്‍ക്കാര്‍ ഓഫിസുകളില്‍ നിയന്ത്രണം കര്‍ശനമാക്കാന്‍ തീരുമാനം.
കൊവിഡ് സമൂഹ വ്യാപനം തടയുന്നതിനു വേണ്ടിയാണ് നിയന്ത്രണം കര്‍ശനമാക്കാന്‍ സര്‍ക്കാര്‍ തീരുമാനിച്ചത്. പ്രധാനമായും തദ്ദേശ സ്ഥാപനങ്ങളിലും വില്ലേജ് ഓഫിസുകളിലും പൊലിസ് സ്‌റ്റേഷനുകളിലുമാണ് നിയന്ത്രണങ്ങള്‍ കര്‍ശനമാക്കുന്നത്.
ജീവനക്കാരന് കൊവിഡ് സ്ഥിരീകരിച്ചതിനെ തുടര്‍ന്ന് മലപ്പുത്ത് പഞ്ചായത്ത് ഓഫിസ് അടച്ചിടേണ്ടി വന്നതിനെ തുടര്‍ന്നും മറ്റു ജില്ലകളില്‍ ജീവനക്കാര്‍ ക്വറന്റൈനില്‍ പ്രവേശിക്കേണ്ടി വന്നതിനാല്‍ ഓഫിസ് പ്രവര്‍ത്തനം നിര്‍ത്തേണ്ട സാഹചര്യം ഉണ്ടായതിനെ തുടര്‍ന്നാണ് നിയന്ത്രണം ഏര്‍പ്പെടുത്താന്‍ സര്‍ക്കാര്‍ തീരുമാനിച്ചത്.
ഒരേ സമയം അഞ്ചില്‍ കൂടുതല്‍ പേരെ അനുവദിക്കില്ല. താപനില പരിശോധിച്ചതിനു ശേഷം മാത്രമേ കടത്തി വിടൂ. ഓഫിസ് പരിസരങ്ങളില്‍ കൂട്ടം കൂടി നില്‍ക്കാന്‍ അനുവദിക്കില്ല.
പൊതു ജനങ്ങള്‍ കൂടുതലായി എത്തുന്ന ഓഫിസുകളുടെ പരിസരത്ത് കൈ ശുചീകരിക്കാനുള്ള സൗകര്യവും സാനിറ്റൈസറും നിര്‍ബന്ധമായും ഉണ്ടായിരിക്കണം.
ഓഫിസിലെത്തുന്നവരുടെ പേര്, വിലാസം, ഫോണ്‍നമ്പര്‍, കാണേണ്ട ഉദ്യോഗസ്ഥന്റെ പേര് എന്നിവ രേഖപ്പെടുത്താന്‍ പ്രത്യേകം ജീവനക്കാരെ നിയമിക്കും. അപേക്ഷകളും മറ്റു നടപടിക്രമങ്ങളും കഴിവതും ഓണ്‍ലൈന്‍ വഴിയാക്കാന്‍ പ്രോത്സാഹിപ്പിക്കണം.
അന്വേഷണങ്ങള്‍ ഫോണ്‍ വഴിയാക്കാനും നിര്‍ദേശിച്ചിട്ടുണ്ട്. ഉദ്യോഗസ്ഥരെ നേരിട്ടു കാണേണ്ടത് ആവശ്യമാണെങ്കില്‍ അതിനു ഫോണ്‍വഴി സമയം നിശ്ചയിച്ചു നല്‍കണമെന്നും നിര്‍ദേശമുണ്ട്.
ഓഫിസ് പരിസരത്ത് ആളുകള്‍ കൂടി നില്‍ക്കുകയും തുപ്പുകയും ചെയ്യുന്നത് കര്‍ശനമായി ഒഴിവാക്കണമെന്നും ലിഫ്റ്റുള്ള ഓഫിസുകളില്‍ ലിഫ്റ്റില്‍ കയറുന്നവരുടെ എണ്ണം നിശ്ചയിച്ച് നോട്ടിസ് പതിക്കണമെന്നും 10 വയസില്‍ താഴെയുള്ള കുട്ടികളും 60 വയസിനു മുകളിലുള്ളവരും ഓഫിസുകളില്‍ എത്തുന്നത് ഒഴിവാക്കുകയും അവരുടെ ആവശ്യങ്ങള്‍ പരിഹരിക്കാന്‍ മറ്റുമാര്‍ഗങ്ങള്‍ നടപ്പാക്കുകയും വേണമെന്നും നിര്‍ദേശമുണ്ട്.