തൃശൂര്‍: നഗരഹൃദയങ്ങളെ ഇളക്കിമറിച്ച് യു.ഡി.എഫ് തൃശൂര്‍ മണ്ഡലം സ്ഥാനാര്‍ഥി ടി.എന്‍ പ്രതാപന്റെ പര്യടനം. തൃശൂര്‍ മണ്ഡലത്തിലെ വിവിധ ഇടങ്ങളിലായിരുന്നു ഒന്നാംഘട്ട പര്യടനത്തിന്റെ ഭാഗമായി ടി.എന്‍ പ്രതാപന്‍ പര്യടനം നടത്തിയത്. രാവിലെ അയ്യന്തോള്‍ ഇലക്ഷന്‍ കമ്മിറ്റി ഓഫിസ് ഉദ്ഘാടന ചടങ്ങില്‍ പങ്കെടുത്തുകൊണ്ടായിരുന്നു സ്ഥാനാര്‍ഥിയുടെ ഇന്നലത്തെ പര്യടനത്തിനു തുടക്കം. തേറമ്പില്‍ രാമകൃഷ്ണന്‍ ഉദ്ഘാടനം ചെയ്തു.
ചടങ്ങില്‍ ജില്ല ഫാര്‍മേഴ്‌സ് സഹകരണ സംഘം ജീവനക്കാര്‍ കെട്ടിവയ്ക്കാനുള്ള തുക പ്രതാപന് കൈമാറി. ഒരു കൊട്ട ജൈവ വെള്ളരി നല്‍കിയാണ് സ്ഥാനാര്‍ഥിയെ അവര്‍ സ്വീകരിച്ചത്.
തുടര്‍ന്ന് ഒളരി പള്ളി, ചേറ്റുപുഴ പള്ളി, കോണ്‍വന്റ് എന്നിവടങ്ങളില്‍ സന്ദര്‍ശിച്ചു. സെന്റ് അലോഷ്യസില്‍ വോട്ടഭ്യര്‍ഥിച്ച അദ്ദേഹം കുട്ടികളോട് കുശലം പറഞ്ഞു. പിന്നീട് പുല്ലഴി ലക്ഷ്മി മില്‍, പുല്ലഴി സെന്റ് ജോസഫ് ഹാള്‍ സന്ദര്‍ശിച്ചു. മുതിര്‍ന്ന അന്തേവാസികളുടെ അനുഗ്രഹം വാങ്ങിച്ചു. സിസ്റ്റര്‍ കൊച്ചുത്രേസ്യ, ത്രേസ്യാമ്മ എന്നിവര്‍ പങ്കെടുത്തു.
സെന്റ് ജോസഫ് മെന്റല്‍ ഹെല്‍ത്ത് കെയര്‍ സന്ദര്‍ശിച്ച പ്രതാപന്‍ ഫാദര്‍ ജോണിന്റെ അനുഗ്രഹം വാങ്ങിച്ചു. പുല്ലഴി സെന്റ് ക്രീസിറ്റീന ഹോമിലും സന്ദര്‍ശിച്ചു. നെറ്റിയില്‍ കറുത്ത കുരിശടയാളം വരച്ചാണ് സ്ഥാനാര്‍ഥിയെ അവര്‍ സ്വീകരിച്ചത്.  നവജ്യോതി കോളജില്‍ പ്രിന്‍സിപ്പല്‍ സിസ്റ്റര്‍ ആന്‍ കരോളിന്റെ അടുത്ത് അനുഗ്രഹം വാങ്ങിച്ചു. കെ.പി.സി.സി ജനറല്‍ സെക്രട്ടറി പത്മജ വേണുഗോപാല്‍, കൗണ്‍സിലര്‍ എ. പ്രസാദ് എന്നിവര്‍ സ്ഥാനാര്‍ഥിക്കൊപ്പമുണ്ടായിരുന്നു. ജില്ല സഹകരണ സംഘം, അയ്യന്തോള്‍ യു.പി സ്‌കൂള്‍ സന്ദര്‍ശിച്ചു.
ലാലൂര്‍ സെന്ററില്‍ കത്തുന്ന വെയിലത്ത് കാത്തുനിന്ന കോണ്‍ഗ്രസ് പ്രവര്‍ത്തകര്‍ മുദ്രാവാക്യ വിളികളോടെയായിരുന്നു സ്വീകരണം നല്‍കിയത്. സെന്റ് സെബാസ്റ്റിയന്‍ പള്ളി, അരണാട്ടുകര ഇന്‍ഫന്റ് ജീസസ് കോണ്‍വന്‍ പൂത്തോള്‍ കാല്‍വരി ആശ്രമം, സോഷ്യല്‍ സെന്റര്‍ സെന്റ് ആനീസ് എസ്.ജി.ഇ.എച്ച്.എസ് സ്‌കൂളും നിര്‍മല കോളജും സന്ദര്‍ശിച്ചു. പരീക്ഷ കഴിയുന്ന അവസാന ദിവസമായതിനാല്‍ കുട്ടികളുമായി സെല്‍ഫിയെടുത്ത് സന്തോഷം പങ്കുവെച്ചു. സേവാസദനം സന്ദര്‍ശിച്ച അദ്ദേഹത്തെ സെക്രട്ടറി ഇന്ദിര ടീച്ചര്‍, ഗിരിജ വല്ലഭന്‍ എന്നിവര്‍ സ്വാഗതം ചെയ്തു. പൂങ്കുന്നം സീതാറാം ടെക്സ്റ്റയില്‍സ് സന്ദര്‍ശിച്ച അദ്ദേഹത്തെ കരിക്കിന്‍ വെള്ളം നല്‍കിയും പൊന്നാട അണിയിച്ചുകൊണ്ടായിരുന്നു തൊഴിലാളികള്‍ സ്വീകരിച്ചത്. തൊഴിലാളികളുടെ പ്രശ്‌നം മനസിലാക്കി നിങ്ങളുടെ കൂടെ ഞാനുണ്ടാവുമെന്നും അദ്ദേഹം അവര്‍ക്കുറപ്പു നല്‍കി. നഗരത്തിലെ പ്രധാന സ്‌കൂളുകളിലൊന്നായ ദേവമാത പബ്ലിക് സ്‌കൂള്‍ സന്ദര്‍ശിച്ചു. അധ്യാപകര്‍ക്ക് വേണ്ടി നടക്കുന്ന പ്രത്യേത പഠന ക്ലാസില്‍ കയറി അവരുമായി സംവദിച്ചു. ദേവ മാത സ്‌കൂള്‍ പ്രിന്‍സിപ്പല്‍ ഫാ.ഷാജു എടമന, കൃതിക, അധ്യാപകര്‍ എന്നിവര്‍ പങ്കെടുത്തു.
സെന്റ് മേരീസ് കോളജ്, സെന്റ്‌തോസ് കോള്‌വില്‍വട്ടത്ത് വോട്ടഭ്യര്‍ഥിച്ച അദ്ദേഹം വൈകിട്ട് നഗരത്തില്‍ നടന്ന യു.ഡി.എഫ് പ്രവര്‍ത്തകരുടെ റോഡ് ഷോയിലും പങ്കെടുത്തു.