കാസന്‍: അവസാന നാലിലെ പോരാളികളെ നിര്‍ണയിക്കുന്ന ക്വാര്‍ട്ടര്‍ പോരാട്ടങ്ങള്‍ക്ക് ഇന്ന് തുടക്കം. 2018 ലോകകപ്പിലെ ഏറ്റവും ആവേശകരമായ മത്സരമാണ് ഇന്ന് കാസന്‍ അരീന സ്റ്റേഡിയത്തില്‍ അരങ്ങേറുന്നത്. ഇന്ന് നടക്കുന്ന രണ്ടാം ക്വാര്‍ട്ടര്‍ മത്സരത്തില്‍ ലോകകപ്പിലെ ഫേവറിറ്റ്‌സുകളായ ബ്രസീലും ബെല്‍ജിയവും തമ്മില്‍ ഏറ്റുമുട്ടും. ഇന്ത്യന്‍ സമയം രാത്രി 11.30നാണ് മത്സരം.
ലോകകപ്പ് ചരിത്രത്തില്‍ ഏറ്റവും കൂടുതല്‍ തവണ ചാംപ്യന്മാരായ ടീമാണ് ബ്രസീല്‍. കരുത്തന്മാരാണെങ്കിലും ബെല്‍ജിയത്തിന് ഇതുവരെ കപ്പൊന്നും നേടാന്‍ സാധിച്ചിട്ടില്ല. 1986 ല്‍ നാലാം സ്ഥാനത്തെത്തിയതാണ് ബെല്‍ജിയത്തിന്റെ ഏറ്റവും വലിയ നേട്ടം.
ഇത് അഞ്ചാം തവണയാണ് ബ്രസീലും ബെല്‍ജിയവും തമ്മില്‍ ഏറ്റുമുട്ടുന്നത്. കഴിഞ്ഞ നാല് മത്സരങ്ങില്‍ മൂന്നിലും ബ്രസീലിനൊപ്പമായിരുന്നു വിജയം. 1963 ഏപ്രിലില്‍ നടന്ന സൗഹൃദ മത്സരത്തില്‍ 5-1 നായിരുന്നു ബെല്‍ജിയത്തോട് ബ്രസീലിന്റെ ഏകപരാജയം. പിന്നീടുള്ള മത്സരങ്ങളിലെല്ലാം ബ്രസീല്‍ ജയിച്ചു. 2002 ലോകകപ്പ് പ്രീ ക്വാര്‍ട്ടറിലായിരുന്നു അവസാനമായി ഇരുടീമുകളും മാറ്റുരച്ചത്. അന്ന് ബ്രസീല്‍ 2-0 ത്തിന് വിജയിച്ചു. ഇത് ഏഴാം തവണയാണ് ബ്രസീല്‍ ലോകകപ്പ് ക്വാര്‍ട്ടറില്‍ പ്രവേശിക്കുന്നത്.
പ്രീ ക്വാര്‍ട്ടറില്‍ മെക്‌സിക്കോയെ 2-0ത്തിന് പരാജയപ്പെടുത്തിയാണ് ബ്രസീലിന്റെ ക്വാര്‍ട്ടര്‍ പ്രവേശനം. പ്രീ ക്വാര്‍ട്ടറില്‍ ഏഷ്യന്‍ കരുത്തരായ ജപ്പാനുമായി രണ്ട് ഗോളിന് പിന്നില്‍ നിന്ന ശേഷം മൂന്ന് ഗോളുകളടിച്ച് കളി തിരിച്ചുപിടിച്ചാണ് ബെല്‍ജിയം ക്വാര്‍ട്ടറിലെത്തിയത്. കരുത്തുറ്റ മധ്യനിരയും മുന്നേറ്റവുമാണ് ഇരു ടീമുകളുടേയും കരുത്ത്. ഫിലിപ്പെ കുട്ടീഞ്ഞോ, നെയ്മര്‍, കസെമിറോ, വില്യന്‍, പൗളീഞ്ഞോ എന്നീ താരങ്ങളുള്ള ബ്രസീലിനെ ഹസാര്‍ഡ്, മെര്‍ട്ടനസ്, കെവിന്‍ ഡിബ്രുയ്ന്‍, മെര്‍ട്ടനസ്, ലുക്കാക്കും എന്നിവരെ മുന്‍നിര്‍ത്തിയാവും ബെല്‍ജിയം നേരിടുക.

ഫെല്ലെയ്‌നി ആദ്യ
ഇലവനില്‍ ഇറങ്ങും

മോസ്‌കോ: ബ്രസീലിനെതിരേയുള്ള ക്വാര്‍ട്ടര്‍ പോരാട്ടത്തില്‍ ബെല്‍ജിയത്തിന്റെ മാഞ്ചസ്റ്റര്‍ യുനൈറ്റഡ് താരം ഫെല്ലെയ്‌നി ആദ്യ ഇലവനില്‍ എത്തുമെന്ന് കോച്ച് റോബര്‍ട്ടോ മാര്‍ട്ടിനെസ് വ്യക്തമാക്കി. ജപ്പാനെതിരായുള്ള പ്രീ ക്വാര്‍ട്ടര്‍ പോരാട്ടത്തില്‍ പകരക്കാരനായി വന്ന് ഫെല്ലയ്‌നി ഗോള്‍ നേടിയിരുന്നു. ഫെല്ലയ്‌നിയുടെ വരവോടെയാണ് ബെല്‍ജിയത്തിന് മികവിലേക്കെത്താനായത്. കഴിഞ്ഞ മത്സരത്തില്‍ രണ്ടാം മഞ്ഞക്കാര്‍ഡ് വാങ്ങിയ ബ്രസീല്‍ താരം കസമിറോ ക്വാര്‍ട്ടര്‍ മത്സരത്തില്‍ പുറത്തിരിക്കും. പകരം ഫെര്‍ണാണ്ടീന്യോയോ റെനാറ്റോ അഗസ്‌റ്റോയൊ ആദ്യ ഇലവനില്‍ ഇറങ്ങും.