ഗൂഡല്ലൂര്‍: ഗൂഡല്ലൂര്‍ ഡിപ്പോയില്‍ നിന്ന് ഗൂഡല്ലൂര്‍-പന്തല്ലൂര്‍ താലൂക്കുകളിലേക്ക് സര്‍വിസ് നടത്തുന്ന തമിഴ്‌നാട് ട്രാന്‍സ്‌പോര്‍ട്ട് ബസുകള്‍ സമയനിഷ്ഠത പാലിക്കുന്നില്ലെന്ന് പരാതി.
മുന്നറിയിപ്പില്ലാതെ ട്രിപ്പുകള്‍ റദ്ദാക്കുന്നതായും പരാതിയുണ്ട്. ഗൂഡല്ലൂരില്‍ നിന്ന് വൈകുന്നേരം 5.30ന് ദേവര്‍ഷോല വഴി പാട്ടവയലിലേക്ക് സര്‍വിസ് നടത്തുന്ന ബസ് ഒരാഴ്ചയായി സര്‍വിസ് നിര്‍ത്തിവച്ചിരിക്കുകയാണ്. ചില ദിവസങ്ങളില്‍ വൈകിട്ട് ആറ് കഴിഞ്ഞ് മറ്റ് സ്ഥലങ്ങളിലേക്ക് സര്‍വിസ് നടത്തുന്ന ബസ് ട്രിപ്പ് മുടക്കി പാട്ടവയലിലേക്ക് സര്‍വിസ് നടത്തുന്നുണ്ട്.
വൈകുന്നേര സമയമായതിനാല്‍ സ്‌കൂള്‍-കോളജ് വിദ്യാര്‍ഥികളും ജോലി കഴിഞ്ഞ് വീട്ടിലേക്ക് മടങ്ങുന്നവരുമായ യാത്രക്കാരും ഉള്‍പ്പെടെ നൂറുക്കണക്കിന് യാത്രക്കാരാണ് ഈ ബസിനെ ആശ്രയിക്കുന്നത്. എന്നാല്‍ ബസിന് മണിക്കൂറുകളോളം കാത്തിരിക്കേണ്ട അവസ്ഥയാണുള്ളത്. ഇതേക്കുറിച്ച് ഡിപ്പോ അധികാരികളോട് അന്വോഷിച്ചാല്‍ വ്യക്തമായ മറുപടിയും ലഭിക്കുകയില്ല. ഓവാലി പഞ്ചായത്തിലെ ഗാന്ധിനഗറിലേക്ക് രാത്രി 7.30ന് ഗൂഡല്ലൂരില്‍ നിന്ന് സര്‍വീസ് നടത്തിയിരുന്ന ബസും ഒരാഴ്ചയായി റദ്ദാക്കിയിരിക്കുകയാണ്. പുലര്‍ച്ചെ 5.30ന് മാങ്കോടില്‍ നിന്ന് ഗൂഡല്ലൂരിലേക്ക് സര്‍വിസ് നടത്തിയിരുന്ന സര്‍വിസ് പുനസ്ഥാപിക്കണമെന്ന് ജനങ്ങള്‍ ആവശ്യപ്പെടുന്നത്. സര്‍വിസ് കൃത്യമാക്കുന്നതിന് നടപടി സ്വീകരിക്കണമെന്നാവശ്യം ശക്തമാകുകയാണ്.