തിരുവനന്തപുരം: മന്ത്രിസഭാ യോഗങ്ങളില്‍ കൈക്കൊള്ളുന്ന തീരുമാനങ്ങള്‍ പരസ്യമാക്കാന്‍ കഴിയില്ലെന്നു സര്‍ക്കാര്‍.

വിവരാവകാശനിയമം വഴി അപേക്ഷിക്കുന്നവര്‍ക്ക് മന്ത്രിസഭാ തീരുമാനങ്ങള്‍ ലഭ്യമാക്കണമെന്ന നിര്‍ദ്ദേശം നടപ്പാക്കാനാവില്ലെന്ന് സര്‍ക്കാര്‍ മുഖ്യ വിവരാവകാശ കമ്മിഷണര്‍ വിന്‍സണ്‍ എം.പോളിനെ അറിയിച്ചു. തീരുമാനങ്ങള്‍ പരസ്യമാക്കണമെന്ന വിന്‍സന്‍ എം. പോളിന്റെ ഉത്തരവ് സര്‍ക്കാര്‍ തള്ളി. 

വകുപ്പുകളെ സംബന്ധിച്ച രഹസ്യ വിവരങ്ങളും മറ്റും ഇത്തരത്തില്‍ പുറത്തു വിടുന്നത് പ്രതിസന്ധി സൃഷ്ടിക്കുമെന്നു സര്‍ക്കാര്‍ വ്യക്തമാക്കി.

സംസ്ഥാനത്തിന്റെ ആഭ്യന്തര സുരക്ഷ സംബന്ധിച്ച പല തീരുമാനങ്ങളും മന്ത്രിസഭ കൈക്കൊള്ളും. ഇതെല്ലാം പുറത്തുവിടാനാവില്ല.

പ്രായോഗിക ബുദ്ധിമുട്ടുകളും നടപടി ക്രമങ്ങളിലെ സങ്കീര്‍ണതകളും ഇത്തരത്തില്‍ വിവരങ്ങള്‍ നല്‍കുന്നതിന് തടസമാണെന്നും കമ്മിഷനുനല്‍കിയ വിശദീകരണ കുറിപ്പില്‍ സര്‍ക്കാര്‍ വ്യക്തമാക്കി.

ഇക്കാര്യത്തില്‍ ഹൈക്കോടതിയെ സമീപിക്കാനും സര്‍ക്കാര്‍ ആലോചിക്കുന്നുണ്ട്.

കഴിഞ്ഞ മാസമാണ് തീരുമാനങ്ങള്‍ പുറത്തു വിടണമെന്നും വിവരങ്ങള്‍ സര്‍ക്കാര്‍ വെബ്‌സൈറ്റില്‍ പ്രസിദ്ധീകരിക്കുന്നത് പരിഗണിക്കണമെന്നും കമ്മിഷന്‍ സര്‍ക്കാരിനോട് നിര്‍ദ്ദേശിച്ചത്.