മലപ്പുറം: കുട്ടികള്‍ക്കെതിരേയുള്ള ലൈംഗികാതിക്രമങ്ങള്‍ തടയുന്നതിനു പൊതുജനങ്ങളെയും കുട്ടികളെയും ബോധവല്‍ക്കരിക്കുന്ന സന്ദേശവുമായി ഡല്‍ഹി ജാമിഅ മില്ലിയ്യ യൂനിവേഴ്‌സിറ്റിയിലെ വിദ്യാര്‍ഥി അല്‍ അമീന്‍ മലപ്പുറത്തെത്തി.
ജില്ലയിലെ വിവിധ വിദ്യാഭ്യാസ സ്ഥാപനങ്ങള്‍ അദ്ദേഹം സന്ദര്‍ശിച്ചു. വിദ്യാര്‍ഥികളുമായും അധ്യാപകരുമായും സംവദിച്ചു. ജമ്മുവില്‍നിന്നു കേരളം ഉള്‍പ്പെടെ 11 സംസ്ഥാനങ്ങളിലൂടെയാണ് അല്‍ അമീന്റെ യാത്ര. പെരുവള്ളൂര്‍ സ്‌കൂള്‍, മലപ്പുറം ഗവ. കോളജ്, സെന്റ് ജെമ്മാസ് മലപ്പുറം എന്നിവിടങ്ങളില്‍ ഇന്നലെ വിദ്യാര്‍ഥികളുമായി സംവദിച്ചു. ഇന്നു രാവിലെ രാവിലെ 10ന് ഇരുമ്പുഴി ഗവ. സ്‌കൂളിലും ഉച്ചയ്ക്ക് 2.30നു മഞ്ചേരി ബോയ്‌സ് സ്‌കൂളിലും പ്രചാരണം നടത്തും. ജില്ലാ ചൈല്‍ഡ് പ്രൊട്ടക്ഷന്‍ യൂനിറ്റിന്റെ നേതൃത്വത്തിലാണ് ജില്ലയില്‍ കാംപയിന്‍ സംഘടിപ്പിക്കുന്നത്.