മട്ടന്നൂര്‍: ചാവശ്ശേരി 19-ാം മൈലില്‍ നിറഞ്ഞു കവിഞ്ഞ മാലിന്യപെട്ടിയിലെ മാലിന്യങ്ങള്‍ നഗരസഭനീക്കം ചെയ്തു.
പാതയോരത്ത് മാലിന്യമിടുന്നതിനായി സ്ഥാപിച്ച ബോക്‌സാണ് മാസങ്ങളായി നിറഞ്ഞു കവിഞ്ഞിട്ടും തിരിഞ്ഞു നോക്കാന്‍ പോലും ആരുമില്ലത്തായത് കഴിഞ്ഞ ദിവസം സുപ്രഭാതം വാര്‍ത്തയാക്കിയിരുന്നു. ഇതിനെ തുടര്‍ന്നാണ് അടിയന്തിര നടപടിയുമായി നഗരസഭാ ആരോഗ്യവിഭാഗം മുന്‍പോട്ടുവന്നത്.
ഇരിട്ടി നഗരസഭയില്‍ പെടുന്ന 19-ാം മൈലിലാണ് മാലിന്യ നിക്ഷേപത്തിനായി മാസങ്ങള്‍ക്ക് മുന്‍പ് ബോക്‌സ് സ്ഥാപിച്ചത്.ജനവാസ കേന്ദ്രത്തിനു സമീപം മാലിന്യങ്ങള്‍ തള്ളുന്നതു നിത്യസംഭവമായി മാറിയതിനെ തുടര്‍ന്ന് പരാതപ്പെട്ടിരുന്നു. മാലിന്യങ്ങള്‍ പ്ലാസ്റ്റിക് കവറുകളിലാക്കിയാണ് റോഡരികില്‍ തള്ളുന്നത്. മാലിന്യം ചീഞ്ഞ് ദുര്‍ഗന്ധം വമിക്കുന്ന അവസ്ഥയായിരുന്നു.
കുന്നുകൂടി കിടക്കുന്ന മാലിന്യങ്ങള്‍ കാരണം തെരുവ് നായ്ക്കള്‍ ഈ മേഖലയില്‍ വിഹരിക്കുകയായിരുന്നു. നഗരസഭ അധികൃതര്‍ക്ക് പലതവണ പരാതി നല്‍കിയിട്ടും പരിഹാരമാവാത്തതിനെ തുടര്‍ന്നാണ് പത്രവാര്‍ത്തയായത്. ഇവിടെ മാലിന്യം അനിയന്ത്രിതമായി തള്ളുന്നതിനെതിരെ പ്രദേശവാസികള്‍ ബോര്‍ഡും സ്ഥാപിച്ചിട്ടുണ്ട്. ഇതിനിടെയാണ് മാലിന്യം നീക്കം ചെയ്തത്.