കാസര്‍കോട്: സംസ്ഥാന ഹജ്ജ് കമ്മിറ്റി മുഖേന യാത്ര തിരിക്കുന്ന ജില്ലയിലെ ഹജ്ജ് തീര്‍ഥാടകര്‍ക്കുള്ള മൂന്നാംഘട്ട സാങ്കേതിക പരിശീലന ക്ലാസ് നാളെ തുടങ്ങും. നാളെ രാവിലെ ഒന്‍പതിനു കാഞ്ഞങ്ങാട് പുതിയകോട്ട മദ്‌റസാ ഹാളിലും 11നു രാവിലെ ഒന്‍പതിനു ചെര്‍ക്കള ഖുവ്വത്തുല്‍ ഇസ്‌ലാം മദ്‌റസാ ഹാളിലും 14നു രാവിലെ ഒന്‍പതിനു ഉപ്പള നയാബസാര്‍ എ.ജെ.ഐ. ഹയര്‍ സെക്കന്‍ഡറി സ്‌കൂളിലും ക്ലാസുകള്‍ നടക്കും.
17നു രാവിലെ ഒന്‍പതിനു തൃക്കരിപ്പൂര്‍ ഇളമ്പച്ചി ഫായിക്ക ഇന്‍ഡോര്‍ സ്റ്റേഡിയത്തിലാണ് ക്ലാസ് നടക്കുക. ക്ലാസുകള്‍ക്ക് സംസ്ഥാന ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ് കുഞ്ഞ് മൗലവി, ഹജ്ജ് കമ്മിറ്റി മെമ്പര്‍ സി.എച്ച് മുഹമ്മദ് കുഞ്ഞി ചായിന്റടി, ഹജ്ജ് കമ്മിറ്റി അസിസ്റ്റന്റ് സെക്രട്ടറി ടി.കെ അബ്ദുല്‍ റഹിമാന്‍, സംസ്ഥാന ഹജ്ജ് കോര്‍ഡിനേറ്റര്‍ എന്‍.പി ഷാജഹാന്‍, മാസ്റ്റര്‍ ട്രെയിനര്‍മാരായ പി.എ നിഷാദ്, മുജീബ് റഹ്മാന്‍, ജില്ലാ ഹജ്ജ് ട്രെയിനര്‍ എന്‍.പി സൈനുദ്ദീന്‍ എന്നിവര്‍ നേതൃത്വം നല്‍കും. ക്ലാസുകളില്‍ ലഗേജ് സ്റ്റിക്കര്‍, മഫ്ത സ്റ്റിക്കറുകള്‍ വിതരണം ചെയ്യും.
ഹജ്ജ് യാത്ര ഉറപ്പായവരും വെയ്റ്റിങ് ലിസ്റ്റില്‍ 4000 വരെയുള്ളവരില്‍ നിന്നു യാത്രയ്ക്കു തയാറായി ഹജ്ജ് കമ്മിറ്റിക്കു പാസ്‌പോര്‍ട്ട് സമര്‍പ്പിച്ചവരും അതാതു മേഖലകളിലെ ക്ലാസുകളില്‍ പങ്കെടുക്കണം. കവറിലുള്ള മുഴുവന്‍ ഹാജിമാരും നിര്‍ബന്ധമായും ക്ലാസില്‍ ഹാജരാകണം.