കൊച്ചി: ഈ വര്‍ഷത്തെ സംസ്ഥാന ബജറ്റ് അവതരണത്തില്‍ ടെക്‌സ്റ്റയില്‍ ഉല്‍പന്നങ്ങള്‍ക്ക് പ്രഖ്യാപിച്ച രണ്ട് ശതമാനം വ്യാപാര നികുതി ഒഴിവാക്കണമെന്ന് കേരള സംസ്ഥാന വ്യാപാരി വ്യവസായി സമിതി ആവശ്യപ്പെട്ടു. കേരളത്തിലെ മുഴുവന്‍ ടെക്സ്റ്റയില്‍ വ്യാപാര മേഖലയേയും അതുവഴി തയ്യല്‍ വ്യവസായ മേഖലയേയും നികുതി നിര്‍ദേശം ബാധിക്കുമെന്നും തുടര്‍ന്ന് ഇത് മേഖലയെ തകര്‍ച്ചയിലേക്ക് നയിക്കുമെന്നും ജില്ലാ സെക്രട്ടറി ടി.എം അബ്ദുള്‍ വാഹിദ് പ്രസ്താവനയിലൂടെ പറഞ്ഞു.
തയ്യല്‍ വ്യവസായ മേഖലയെ ഉത്തേജിപ്പിക്കുവാനും കൈത്തറി വ്യവസായ മേഖലയെ പുനരുജ്ജീവിപ്പിക്കാനും വേണ്ടിയാണ് 2010 കാലയളവുവരെയുള്ള സംസ്ഥാന സര്‍ക്കാരുകള്‍ ടെക്സ്റ്റയില്‍ ഉല്‍പ്പന്നങ്ങള്‍ക്ക് നികുതി ഏര്‍പ്പെടുത്തിയത്. കഴിഞ്ഞ സര്‍ക്കാരാണ് ഇന്ത്യയിലെങ്ങും ഇല്ലാത്ത ടെക്സ്റ്റയില്‍ നികുതി ഏര്‍പ്പെടുത്തിയത്. ഈ നികുതി പൂര്‍ണമായും ഒഴിവാക്കണം. വ്യാപാര മേഖലയെ ഉത്തേജിപ്പിക്കുവാനും പുത്തനുണര്‍വ്വ് വീണ്ടെടുക്കാനും വ്യാപാരി സമൂഹം ഉന്നയിക്കുന്ന ആവശ്യങ്ങള്‍ നടപ്പാക്കണമെന്നും അദ്ദേഹം പറഞ്ഞു.