ഇന്‍ഡോര്‍: മികച്ച സ്‌കോര്‍ നേടിയ കിങ്‌സ് ഇലവന്‍ പഞ്ചാബിന് അതേ നാണയത്തില്‍ മറുപടി നല്‍കി മുംബൈ ഇന്ത്യന്‍സ് ആറ് കളികളില്‍ അഞ്ചാം വിജയം സ്വന്തമാക്കി പത്ത് പോയിന്റുമായി ഒന്നാം സ്ഥാനത്തേക്ക് കയറി. എട്ട് വിക്കറ്റിന്റെ വിജയം പിടിച്ചാണ് മുംബൈയുടെ മുന്നേറ്റം. ടോസ് നേടിയ മുബൈ പഞ്ചാബിനെ ബാറ്റിങിന് വിടുകയായിരുന്നു.
നിശ്ചിത 20 ഓവറില്‍ പഞ്ചാബ് 198 റണ്‍സെന്ന മികച്ച സ്‌കോര്‍ പടുത്തുയര്‍ത്തി. മറുപടി പറഞ്ഞ മുംബൈ വിജയ ലക്ഷ്യം 15.3 ഓവറില്‍ 199 റണ്‍സെടുത്ത് അനായാസം മറികടന്നു. ഓപണര്‍മാരായ ജോസ് ബട്‌ലര്‍ 37 പന്തില്‍ ഏഴ് ഫോറും അഞ്ച് സിക്‌സും പറത്തി 77 റണ്‍സും പാര്‍ഥിവ് പട്ടേല്‍ 18 പന്തില്‍ നാല് ഫോറും രണ്ട് സിക്‌സുമടക്കം 37 റണ്‍സും കണ്ടെത്തി മികച്ച തുടക്കം നല്‍കി. പിന്നാലെയെത്തിയ നിതീഷ് റാണ സീസണിലെ മൂന്നാം അര്‍ധ സെഞ്ച്വറി നേടി 34 പന്തില്‍ 62 റണ്‍സെടുത്ത് പുറത്താകാതെ നിന്ന് മുംബൈയെ വിജയ തീരത്തെത്തിച്ചു. ഏഴ് സിക്‌സറുകള്‍ റാണ തൂക്കി. ഹര്‍ദിക് പാണ്ഡ്യ നാല് പന്തില്‍ 15 റണ്‍സ് വാരി.
ഐ.പി.എല്‍ പത്താം സീസണിലെ രണ്ടാം സെഞ്ച്വറി നേടി ഓപണര്‍ ഹാഷിം അംലയുടെ പോരാട്ടം പാഴായി. അംല പുറത്താകാതെ 60 പന്തില്‍ 104 റണ്‍സെടുത്തു. ദക്ഷിണാഫ്രിക്കന്‍ താരത്തിന്റെ മികവിലാണ് പഞ്ചാബ് മികച്ച സ്‌കോര്‍ ഉയര്‍ത്തിയത്. അത് പ്രതിരോധിക്കുന്നതില്‍ ബൗളിങ് നിര അമ്പേ പരാജയപ്പെട്ടു. എട്ട് ഫോറും ആറ് സിക്‌സും അടങ്ങുന്നതായിരുന്നു അംലയുടെ ഇന്നിങ്‌സ്. ക്യാപ്റ്റന്‍ മാക്‌സ്‌വല്‍ 18 പന്തില്‍ നാല് ഫോറും മൂന്ന് സിക്‌സും പറത്തി 40 റണ്‍സ് വാരിയതും നിര്‍ണായകമായി. ഓപണര്‍ ഷോണ്‍ മാര്‍ഷ് 26 റണ്‍സില്‍ പുറത്തായി. മുംബൈ നിരയില്‍ മക്ലനാഗന്‍ രണ്ടും ക്രുനല്‍ പാണ്ഡ്യ, ബുമ്‌റ എന്നിവര്‍ ഓരോ വിക്കറ്റും വീഴ്ത്തി.