കൊച്ചി: സ്ഥിര യാത്രക്കാര്‍ക്കായി കൊച്ചി മെട്രോ രണ്ടുതരം പാസുകള്‍ പുറത്തിറക്കി.ഇടപ്പള്ളി മെട്രോ സ്റ്റേഷനില്‍ നടന്ന ചടങ്ങില്‍ കെ.എം.ആര്‍.എല്‍ എം.ഡി എ.പി.എം മുഹമ്മദ് ഹനീഷ് കൊച്ചി മെട്രോ സ്ഥിരം യാത്രക്കാരനായ നുബാജ് സി.ആറിന് 60 ട്രിപ്പുകളുടെ പാസ് നല്‍കി വിതരണോദ്ഘാടനം നിര്‍വഹിച്ചു. തുടക്കത്തില്‍ ആലുവ, ഇടപ്പള്ളി, മഹാരാജാസ് സ്റ്റേഷനുകളില്‍ നിന്ന് മാത്രമേ പാസുകള്‍ വിതരണം ചെയ്യുകയുള്ളു.
കൊച്ചി വണ്‍ കാര്‍ഡുള്ളവര്‍ക്ക് മാത്രമാണ് പാസ് സംവിധാനവും പ്രയോജനപ്പെടുത്താനാവുക. ഈ പാസുകള്‍ ഉപയോഗിച്ച് രണ്ടു നിശ്ചിത സ്റ്റേഷനുകള്‍ക്കിടയില്‍ യാത്ര ചെയ്യാനാവും. 30 ദിവസത്തെ കാലാവധിയുള്ള പ്രതിമാസ പാസില്‍ 30 യാത്രകള്‍ നടത്താം. ദ്വൈമാസ പാസില്‍ 60 ദിവസത്തെ കാലാവധിക്കിടയില്‍ 60 യാത്രകള്‍ നടത്താനാവും. പ്രതിമാസ പാസിന് യഥാര്‍ഥ ടിക്കറ്റ് നിരക്കിന്റെ 25 ശതമാനവും ദ്വൈമാസ പാസിന് ടിക്കറ്റ് നിരക്കിന്റെ 33 ശതമാനവും ഇളവുണ്ടാവും.