മുഹമ്മ: മാരാരിക്കുളം കടല്‍ പുറമ്പോക്കിലെ തെങ്ങിലെ ആദായം എടുക്കുവാന്‍ മത്സ്യത്തൊഴിലാളികളെ അനുവദിക്കുക , അഴിമതിക്കാരും കയ്യേറ്റക്കാരുമായ അവസരവാദികളുടെ കള്ളപ്രചാരണം തിരിച്ചറിയുക എന്നി ആവശ്യങ്ങള്‍ ഉന്നയിച്ച് സി.പി.എം നേതൃത്വത്തില്‍ ഇന്ന് ബഹുജനധര്‍ണ നടത്തുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
മാരാരിക്കുളം വടക്ക് ഗ്രാമപഞ്ചായത്തിലെ അറപ്പയ്ക്കല്‍ -കാറ്റാടി ജനക്ഷേമം പ്രദേശങ്ങളിലെ കടല്‍ പുറമ്പോക്കില്‍ നില്‍ക്കുന്ന തെങ്ങുകളില്‍ നിന്നും ഏതാനും മാസങ്ങളായി ആദായം എടുക്കുന്നത് കളക്ടറുടെ നിര്‍ദ്ദേശപ്രകാരം വില്ലേജ് അധികാരികളാണ്.
ഇവിടെ താമസിക്കുന്ന മത്സ്യത്തൊഴിലാളികള്‍ പരമ്പരാഗതമായി അവര്‍ വച്ചുപിടിപ്പിച്ച തെങ്ങുകളില്‍ നിന്നും തേങ്ങ ഇട്ട് ഉപയോഗിച്ചുവരികയാണ്. കേരളത്തിന്റെ തീരപ്രദേശങ്ങളില്‍ എല്ലാം ഇങ്ങനെതന്നെയാണ്. എന്നാല്‍ മാരാരിക്കുളത്ത് മാത്രം ഇതൊഴിവാക്കിയത് ചിലരുടെ പരാതിയെത്തുടര്‍ന്നാണ്.
കോണ്‍ഗ്രസ്സിന്റെ ഒരു തീരദേശ പഞ്ചായത്തംഗം പുറമ്പോക്ക് കയ്യേറി കെട്ടിടം നിര്‍മ്മിച്ചത് വിവാദമാകുകയും നാട്ടുകാരുടെ പരാതിയെത്തുടര്‍ന്ന് റവന്യു അധികൃതര്‍ അതു പൊളിച്ചുമാറ്റുകയും ചെയ്തിരുന്നു. അതോടൊപ്പം മറ്റുചില റിസോര്‍ട്ടുകള്‍ കൈവശം വച്ചിരിക്കുന്ന പുറമ്പോക്ക് ഭൂമി ഏറ്റെടുക്കുകയും ചെയ്തതാണ്. ഇതേത്തുടര്‍ന്ന് കോണ്‍ഗ്രസ്സിന്റെ ഒരു പ്രാദേശികനേതാവ് നല്‍കിയ പരാതിയുടെ അടിസ്ഥാനത്തിലാണ് പിന്നീട് കളക്ടര്‍ ഈ പ്രദേശത്തെ മുഴുവന്‍ പുറമ്പോക്കിലും ആദായം റവന്യു വകുപ്പ് ഏറ്റെടുക്കാന്‍ ഉത്തരവിട്ടത്. എന്നാല്‍ കള്ള പ്രചരണങ്ങളും അനാവശ്യ സമരങ്ങളുമാണ് കോണ്‍ഗ്രസ്സ് നടത്തിയത്.
സര്‍ക്കാരിനെയും പഞ്ചായത്ത് ഭരണസമിതിയെയും ആക്ഷേപിക്കാനാണ് ഇക്കൂട്ടര്‍ ശ്രമിക്കുന്നത്. എന്നാല്‍ യാഥാര്‍ത്ഥ്യം മനസ്സിലാക്കി ബന്ധപ്പെട്ട അധികാരികള്‍ മത്സ്യത്തൊഴിലാളികളുടെ ജന്മാവകാശം സംരക്ഷിക്കണമെന്ന ആവശ്യമാണ് മുന്നോട്ട് വയ്ക്കുന്നതെന്നും സി പി എം നേതാക്കള്‍ പറഞ്ഞു. ഇതിന്റെ ഭാഗമായാണ് വലിയപ്രക്ഷോഭം ഉയര്‍ത്തിക്കൊണ്ടുവരാന്‍ തീരുമാനിച്ചതെന്നും ഭാരവാഹികള്‍ അറിയിച്ചു. ഇന്ന് പകല്‍ 3.30 മുതല്‍ ജനക്ഷേമത്ത് നടത്തുന്ന ധര്‍ണ്ണ സിപിഐഎം ജില്ലാ സെക്രട്ടറി ആര്‍.നാസര്‍ ഉത്ഘാടനം ചെയ്യും.
പി.പി ചിത്തരഞ്ജന്‍ സമരപ്രഖ്യാപനം നടത്തും. ഏരിയാസെക്രട്ടറി എസ്. രാധാകൃഷ്ണന്‍ അധ്യക്ഷനാകും. കണിച്ചുകുളങ്ങര , മാരാരിക്കുളം ലോക്കല്‍ കമ്മറ്റികളുടെ നേതൃത്വത്തിലാണ് സമരം സംഘടിപ്പിച്ചിരിക്കുന്നനത്. സിപിഎം ലോക്കല്‍ സെക്രട്ടറിമാരായ പി.കെ വേണുഗോപാല്‍ , കെ.പി സജിമോന്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.