ആര്‍പ്പൂക്കര: കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന വൈദ്യുതി മന്ത്രി എം.എം മണി ആശുപത്രി വിട്ടു. വെള്ളിയാഴ്ച ഉച്ചയ്ക്ക് 12 നാണ് തൊടുപുഴ സ്വകാര്യ ആശുപത്രിയില്‍ നിന്നും മന്ത്രിയെ മെഡിക്കല്‍ കോളജ് ആശുപത്രിയിലെത്തിച്ചത്.

വയറ്റിലുണ്ടായ അസുഖത്തെ തുടര്‍ന്ന് ശരീരത്തിലെ ജലാംശം നഷ്ടപ്പെട്ടതു മൂലം ക്രിയാറ്റിന്റെ അളവിന് വലിയ വ്യത്യാസം വന്നിരുന്നു. അതിനാലാണ് നെഫ്രോളജി വിഭാഗത്തില്‍ ചികിത്സ തേടിയെത്തിയത്. ആശുപത്രിയിലെത്തിയശേഷം വിവിധ വിഭാഗങ്ങളിലെ മേധാവികള്‍ തന്നെ നേരിട്ട് എത്തി മന്ത്രിയെ വിദഗ്ധ പരിശോധനയ്ക്ക് വിധേയമാക്കിയിരുന്നു.
എന്നാല്‍ ശരീരത്തില്‍ നിന്നും ജലാംശം നഷ്ടപ്പെട്ടതു മൂലം ഉണ്ടായ ആരോഗ്യ പ്രശ്‌നം ഒഴിച്ച് മറ്റൊന്നും ഇല്ലാത്തതിനാല്‍ ഇന്നലെ ഉച്ചയ്ക്കുശേഷം ആശുപത്രി വിട്ടു.

ആശുപത്രിയിലെ ഡോക്ടര്‍മാര്‍ അടക്കമുള്ളവര്‍ക്ക് നന്ദി രേഖപ്പെടുത്തിയതോടൊപ്പം, തന്നെ ശുശ്രൂഷിച്ച ജീവനക്കാര്‍ ഏത് പാര്‍ലമെന്റ് മണ്ഡലത്തില്‍പ്പെട്ടതാണെന്ന് ചോദിച്ചറിഞ്ഞ് ആ മണ്ഡലത്തിലെ ഇടതു സ്ഥാനാര്‍ഥിക്ക് വോട്ടു ചെയ്യണമെന്നഭ്യര്‍ഥിച്ചാണ് മന്ത്രി ആശുപത്രി വിട്ടത്.