മലപ്പുറം: കോണ്‍ഗ്രസിലെ സമുന്നത നേതാവും ദീര്‍ഘകാലത്തെ പൊതുപ്രവര്‍ത്തന പരിചയവുമുള്ള കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ ആരോഗ്യ മന്ത്രിക്കെതിരേ നടത്തിയ പരാമര്‍ശം ഒഴിവാക്കേണ്ടതായിരുന്നുവെന്ന് മുസലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്. ഈ പരാമര്‍ശം ഉയര്‍ത്തിപ്പിടിച്ച് സര്‍ക്കാരിന്റെ കൊവിഡ് പ്രതിരോധ പ്രവര്‍ത്തനങ്ങളില്‍ പൂര്‍ണമായും സഹകരിച്ച് വരുന്ന യു.ഡി.എഫിനെയും കോണ്‍ഗ്രസിനെയും മോശമായി വിമര്‍ശിക്കുന്നത് മുഖ്യമന്ത്രിയുടെ പദവിക്ക് ചേര്‍ന്നതല്ല. പ്രതിപക്ഷ ബഹുമാനം പോലുമില്ലാത്ത മുഖ്യമന്ത്രിയുടെ ഇത്തരം നടപടിയെ അംഗീകരിക്കാനാവില്ലെന്നും അദ്ദേഹം പറഞ്ഞു. ഇതിന്റെ മറവില്‍ മുഖ്യമന്ത്രിയും സി.പി.എമ്മും നടത്തുന്ന ഒറ്റ തിരിഞ്ഞുള്ള ആക്രമണം അപലപനീയമാണ്. മുല്ലപ്പള്ളിയുടെ പരാമര്‍ശം യു.ഡി.എഫിനെ പ്രതിസന്ധിയിലാക്കിയിട്ടില്ല. സര്‍ക്കാരിന്റെ വീഴ്ച്ചകള്‍ മറച്ചുവെക്കാന്‍ ഈ പരാമര്‍ശം സര്‍ക്കാര്‍ ഉപയോഗപ്പെടുത്തുകയാണ്- അദ്ദേഹം കൂട്ടിച്ചേര്‍ത്തു.