വട്ടിയൂര്‍ക്കാവ്: ബൈക്കില്‍ ഹെല്‍മെറ്റ് ധരിച്ചെത്തിയ സംഘം ഹെല്‍ത്ത് സര്‍വിസ് ജീവനക്കാരിയെ ആക്രമിച്ച് മാല കവര്‍ന്നു രക്ഷപ്പെട്ടു. ഇന്നലെ രാവിലെ ഏഴോടെ കാവല്ലൂരിലായിരുന്നു സംഭവം.
കാവല്ലൂര്‍ വഴുക്കോട്ടുകോണം പണയില്‍ വീട്ടില്‍ രവീന്ദ്രന്റെ ഭാര്യ ലൈല (57) യുടെ 2 പവന്റെ സ്വര്‍ണമാലയാണ് ബൈക്കിലെത്തിയ സംഘം മോഷ്ടിച്ച് കടന്നത്. പേട്ടയില്‍ ഹെല്‍ത്ത് സര്‍വിസിലെ ജീവനക്കാരിയാണ് ലൈല. ജോലിക്കു പോകാന്‍ കാവല്ലൂര്‍ ഭാഗത്തെത്തിയ ഇവരെ ബൈക്കിലെത്തിയ സംഘം പിന്തുടരുകയും ഇവരില്‍ ഒരാള്‍ ലൈലയെ ആക്രമിച്ചശേഷം മാല കവര്‍ന്നു രക്ഷപ്പെടുകയുമായിരുന്നു.
സ്ഥലത്ത് ട്രാഫിക് ക്യാമറകള്‍ സ്ഥാപിച്ചിട്ടില്ലാത്തതിനാല്‍ പ്രതികളെക്കുറിച്ച് പൊലിസിന് സൂചനയൊന്നും ലഭിച്ചിട്ടില്ല. അന്വേഷണം ആരംഭിച്ചിട്ടുണ്ട്.