മംഗളൂരു: കങ്കനാടിയിലെ ഇറച്ചി വില്‍പ്പന മാര്‍ക്കറ്റിലേക്ക് ബീഫ് കൊണ്ടു പോകുകയായിരുന്ന യുവാവിനെ ഗോമാംസം കടത്തുകയാണെന്ന് ആരോപിച്ച് ആക്രമിച്ച സംഭവത്തില്‍ സംഘപരിവാര്‍ പ്രവര്‍ത്തകരായ അഞ്ചു പേരെ പൊലിസ് അറസ്റ്റ് ചെയ്തു.
മംഗളൂരു സൂറത്കലിലെ ഹൊസബെട്ടു സ്വദേശി ദീക്ഷിത് കുമാര്‍ (19), കുച്ചിഗുദ്ദെ രാജു പൂജാരി (19), അത്താവര്‍ സന്തോഷ് കുമാര്‍ (31), ബാലചന്ദ്ര (28), ഉള്ളാള്‍ സ്വദേശി രക്ഷിത് (22) എന്നിവരാണ് ഇന്നലെ അറസ്റ്റിലായത്.
കഴിഞ്ഞ ദിവസമാണ് കേസിനാസ്പദമായ സംഭവം. കുദ്രോളി സ്വദേശിയായ റാഷിദ് (57) ആണ് ആക്രമണത്തിന് ഇരയായത്.
കങ്കനാടിയിലെ ഇറച്ചി മാര്‍ക്കറ്റില്‍ ബീഫ് വില്‍പ്പന നടത്തുന്ന സക്കീര്‍ എന്നയാളുടെ കടയിലേക്ക് തന്റെ ഓട്ടോയില്‍ രണ്ടു കിന്റല്‍ ബീഫുമായി പോകുകയായിരുന്നു റാഷിദ്. ഒട്ടോയെ പിന്തുടര്‍ന്ന് കാര്‍, ഇരുചക്ര വാഹനങ്ങള്‍ എന്നിവയിലായി എത്തിയ സംഘം മംഗളൂരുവിലെ ഫല്‍നിയറിനടുത്തുവച്ച് ഓട്ടോ തടയുകയും റാഷിദിനെ മര്‍ദിക്കുകയുമായിരുന്നു.
നിയമാനുസൃതമായാണ് കുദ്രോളിയിലെ മാര്‍ക്കറ്റില്‍നിന്നു റാഷിദ് ബീഫുമായി കങ്കനാടിയിലേക്കു പോയിരുന്നത്. വാഹനത്തിലുണ്ടായിരുന്ന മാംസത്തില്‍ മണ്ണെണ്ണ ഒഴിച്ച് നശിപ്പിച്ച അക്രമിസംഘം വാഹനം അടിച്ചു തകര്‍ക്കുകയും ചെയ്തു.