ന്യൂഡല്‍ഹി: കാര്യക്ഷമമായ പ്രവര്‍ത്തനങ്ങളും സാമ്പത്തിക പ്രകടനവും വിമാനകമ്പനികളുടെ വ്യക്തിഗത ഉത്തരവാദിത്തങ്ങളാണെന്ന് കേന്ദ്ര വ്യോമയാന മന്ത്രി സുരേഷ് പ്രഭു.
ജെറ്റ് എയര്‍വെയ്‌സ് വിമാനക്കമ്പനി നേരിടുന്ന സാമ്പത്തിക പ്രതിസന്ധി സംബന്ധിച്ച കാര്യത്തോട് പ്രതികരിക്കുകയായിരുന്നു അദ്ദേഹം. വിമാനങ്ങളുടെ ദൈനംദിന സര്‍വിസുകളില്‍ സര്‍ക്കാരിന് ഇടപെടാനാകില്ലെന്നും മന്ത്രി വ്യക്തമാക്കി.
വ്യോമയാന മേഖലയില്‍ വലിയ മത്സരങ്ങളാണ് നടക്കുന്നത്. വിമാനങ്ങളുടെ സര്‍വിസുമായി ബന്ധപ്പെട്ടുള്ള ചെലവുകളുടെ വര്‍ധനവ്, പൈലറ്റുമാരുടെ കുറവ്, ആഭ്യന്തര സര്‍വിസുകളുടെ തടസപ്പെടലുകളെല്ലാം നേരിടേണ്ടതുണ്ട്. എന്നാല്‍ വിമാന സര്‍വിസുകളുമായി ബന്ധപ്പെട്ട് ഈ മേഖലയെ സര്‍ക്കാര്‍ നിരന്തരം നിരീക്ഷിക്കുന്നുണ്ട്. ചെലവുകളുടെ വര്‍ധനവ് കാരണം അനുകുലമായ ചില നടപടികള്‍ ഇവര്‍ക്കായി നല്‍കുന്നുണ്ട്. വിമാന ഇന്ധനത്തിന് വരുന്ന സെന്‍ട്രല്‍ എക്‌സൈസ് ഡ്യൂട്ടി 11 മുതല്‍ 14 ശതമാനം വരെ കുറവ് വരുത്തുന്നതുള്‍പ്പെടെയുള്ള സഹായങ്ങള്‍ സര്‍ക്കാരിന്റെ ഭാഗത്തു നിന്ന് നല്‍കുന്നുണ്ടെന്നും വ്യോമയാന മന്ത്രി പറഞ്ഞു.

ഓരോ വിമാനക്കമ്പനികള്‍ക്കും അവരുടേതായ ബിസിനസിന്റെ അടിസ്ഥാനത്തില്‍ പ്രവര്‍ത്തിക്കാന്‍ സ്വാതന്ത്ര്യമുണ്ട്. കാര്യക്ഷമമായ രീതിയില്‍ സര്‍വിസ് നടത്തല്‍, സാമ്പത്തിക രംഗത്തെ മികച്ച പ്രകടനം തുടങ്ങിയവ ഓരോ കമ്പനികളുടെയും വ്യക്തിഗത ഉത്തരവാദിത്തങ്ങളാണ്. ഇക്കാര്യത്തില്‍ നിക്ഷേപ പങ്കാളികള്‍ക്കും മാറി നില്‍ക്കാനാകില്ലെന്നും സുരേഷ് പ്രഭു പറഞ്ഞു.