ന്യൂഡല്‍ഹി: രാജ്യത്ത് കാന്‍സര്‍ പ്രതിരോധ മരുന്നുകള്‍ക്ക് കേന്ദ്ര സര്‍ക്കാര്‍ വിലകുറച്ചെങ്കിലും പലതും ഇപ്പോഴും വില്‍ക്കുന്നത് ഉയര്‍ന്ന വിലയില്‍ തന്നെ. 42 മരുന്നുകള്‍ക്കാണ് കേന്ദ്ര സര്‍ക്കാര്‍ അടുത്തിടെ വിലകുറച്ചിരുന്നത്.
എന്നാല്‍ മരുന്ന് ഉല്‍പാദന കമ്പനികള്‍ അമിത ലാഭം കൊയ്യാനായി വിലകുറക്കാന്‍ തയാറാകുന്നില്ല. സര്‍ക്കാരിന്റെ നിയന്ത്രണങ്ങളൊന്നും പ്രമുഖ മരുന്ന് ഉല്‍പാദന കമ്പനികള്‍ മുഖവിലക്കെടുക്കുന്നില്ലെന്നതാണ് ഇത് വ്യക്തമാക്കുന്നതെന്ന് അഖിലേന്ത്യാ ഡ്രഗ് ആക്ഷന്‍ നെറ്റ്‌വര്‍ക്ക്(എ.ഐ.ഡി.എ.എന്‍) പറയുന്നു.

ആരോഗ്യത്തിനുള്ള ഉല്‍പന്നങ്ങള്‍ക്കും കാന്‍സര്‍ ഉള്‍പ്പെടെയുള്ള മരുന്നുകള്‍ സാധാരണക്കാര്‍ക്കും പ്രാപ്യമാകുന്ന തലത്തിലേക്കും വിലകുറക്കാന്‍ ഇതുമായി ബന്ധപ്പെട്ട സ്റ്റാന്റിങ് കമ്മിറ്റിക്ക് നീതി ആയോഗ് വിളിച്ചു ചേര്‍ത്ത യോഗത്തില്‍ നിര്‍ദേശം നല്‍കിയിരുന്നു.

എന്നാല്‍ മരുന്ന് വില നിശ്ചയിക്കുന്ന ദേശീയ ഫാര്‍മസ്യൂട്ടിക്കല്‍ പ്രൈസിങ് അതോറിറ്റി ഇക്കാര്യത്തില്‍ കൂടുതല്‍ സാങ്കേതികമായ നടപടിക്രമങ്ങള്‍ സ്വീകരിക്കാന്‍ തയാറായില്ല.
നിര്‍ദേശം എന്താണോ അത് കൂടുതല്‍ വിശകലനം ചെയ്യാതെ അംഗീകരിക്കുകയാണ് പ്രൈസിങ് അതോറിറ്റി ചെയ്തത്.
അതേസമയം വിലകുറക്കാനുള്ള നിര്‍ദേശത്തെ മരുന്ന് ഉല്‍പാദന കമ്പനികള്‍ കാര്യമായി പരിഗണിക്കാന്‍ തയാറായില്ല. മരുന്നുകള്‍ സ്റ്റോക്കിസ്റ്റുകളുടെ അടുത്ത് എത്തുന്നതിന് മുന്‍പായി വിലകുറക്കുകയെന്ന രീതി മരുന്ന് കമ്പനികള്‍ സ്വീകരിക്കാന്‍ തയാറാകുന്നില്ലെന്ന് എ.ഐ.ഡി.എ.എന്‍ കണ്‍വീനര്‍ എസ്. ശ്രീനിവാസന്‍ പറഞ്ഞു.