ഓച്ചിറ: ആലപ്പാട് പഞ്ചായത്തിന്റെ പരിധിയിലുള്ള അഴീക്കല്‍ ബീച്ച് അധികാരികളുടെ അവഗണനയില്‍ നശിക്കുന്നു. കടലും കായലും ഫിഷിങ് ഹാര്‍ബറും ഉള്‍പ്പെടുന്ന കടല്‍ തീരങ്ങളോടു കൂടിയ ബീച്ചില്‍ ദിനംപ്രതി ആയിരക്കണക്കിനു പേരാണ് വന്നുപോകുന്നത്.
എന്നാല്‍ ആലപ്പാട് പഞ്ചായത്തിലെ കരുനാഗപ്പള്ളി കായംകുളം മേഖലയിലെ ജനങ്ങള്‍ക്കും നിരവധി വിനോദസഞ്ചാരികള്‍ക്കും ഏറെ പ്രയോജനമാകുന്ന ബീച്ചിന്റെ ഇപ്പോഴത്തെ അവസ്ഥ വളരെ ശോചനീയമാണ്. ഒരുകോടി രൂപ ചെലവഴിച്ച് നിര്‍മിച്ച നടപ്പാതകള്‍ കാടുപിടിച്ചു നശിക്കുകയാണിപ്പോള്‍.
ഇതു വൃത്തിയാക്കാന്‍ ജീവനക്കാര്‍ ഇല്ലാത്തതും നടപ്പാതകളുടെ ശോചനീയാവസ്ഥയുടെ ആക്കം കൂട്ടുന്നു.
ബീച്ചില്‍ പ്രാഥമിക കാര്യങ്ങള്‍ ചെയ്യാന്‍ പോലും സംവിധാനമില്ല. ബീച്ചിനടുത്തുള്ള വീടുകളാണു സന്ദര്‍ശകര്‍ക്ക് അഭയം. സുരക്ഷാ സംവിധാനം ഒരുക്കാനോ മുന്നറിയിപ്പ് ബോര്‍ഡുകള്‍ സ്ഥാപിക്കാനോ പൊലിസിനെ ബീച്ചില്‍ ഡ്യൂട്ടിക്ക് നിയോഗിക്കാനോ അധികാരികള്‍ തയാറാകുന്നില്ല. ബീച്ചിലെത്തുന്ന സന്ദര്‍ശകരുടെ പ്രദേശവാസികളുടെയും നിരന്തരമായ ആവശ്യത്തിനു മേലെ അധികാരികള്‍ കണ്ണടച്ചപ്പോള്‍ ഇപ്പോള്‍ ബീച്ച് സാമൂഹികവിരുദ്ധര്‍ കൈയടക്കി. സ്‌കൂള്‍ കുട്ടികള്‍ ക്ലാസില്‍ പോകാതെ വന്നിരിക്കുന്നതും പരസ്യ മദ്യപാനവും കാരണം കുടുംബത്തോടൊപ്പം ബീച്ചില്‍ പോകുന്നത് സുരക്ഷിതമല്ലാത്ത അവസ്ഥയാണെന്നു നാട്ടുകാര്‍ തന്നെ ബോധ്യപ്പെടുത്തുന്നു.
കഴിഞ്ഞ മൂന്നു വര്‍ഷമായി ബീച്ചിലെത്തുന്ന സന്ദര്‍ശകരുടെ സുരക്ഷക്കായി ഉച്ചയ്ക്കു രണ്ടിനു ശേഷം ലൈഫ് ഗാര്‍ഡുകളെ നിയോഗിച്ചിരുന്നു. എന്നാല്‍ ഈ മാസം നാലു മുതല്‍ സംസ്ഥാന ടൂറിസം വകുപ്പ് ഡയറക്ടറുടെ നിര്‍ദേശ പ്രകാരം രാവിലെ ഏഴുമുതല്‍ വൈകുന്നേരം ഏഴുവരെ രണ്ട് ലൈഫ് ഗാര്‍ഡുകളെ കൂടി നിയോഗിച്ചിട്ടുണ്ട്. ഈ നിയമനത്തോടെ ബീച്ചിലെത്തുന്ന സന്ദര്‍ശകരുടെ സുരക്ഷ ഉറപ്പാക്കാന്‍ സാധിക്കും.