മലപ്പുറം: കണ്ണമംഗലം ഗ്രാമപഞ്ചായത്തിലെ ഒന്നാംവാര്‍ഡ് ചെങ്ങാനി, ആലങ്കോട് ഗ്രാമപഞ്ചായത്തിലെ എട്ടാം വാര്‍ഡ് ചിയാനൂര്‍ സ്ത്രീസംവരണ വാര്‍ഡുകളിലേക്കുള്ള ഉപതെരഞ്ഞെടുപ്പ് മെയ് 17നു നടക്കും.
ഇതുസംബന്ധിച്ചു സംസ്ഥാന തെരഞ്ഞെടുപ്പ് കമ്മിഷന്റെ വിജ്ഞാപനം ഇന്നു പുറത്തിറങ്ങും.
ഏപ്രില്‍ 28വരെ പത്രിക നല്‍കാം. 29നു സൂക്ഷ്മപരിശോധന നടക്കും.
മെയ് രണ്ടുവരെ പത്രിക പിന്‍വലിക്കാം. 18നാണ് വോട്ടെണ്ണല്‍. വോട്ടെടുപ്പിനുള്ള അന്തിമ വോട്ടര്‍പട്ടികയിലെ അപ്‌ഡേഷനുകള്‍ ഏപ്രില്‍ 27നകം പൂര്‍ത്തിയാക്കി സപ്ലിമെന്ററി പട്ടികയില്‍ ഉള്‍പ്പെടുത്തും.
ഇതുസംബന്ധിച്ചു കലക്ടറേറ്റില്‍ ചേര്‍ന്ന യോഗത്തില്‍ ഇലക്ഷന്‍ ഡെപ്യൂട്ടി കലക്ടര്‍ സി.വി സാജന്‍ അധ്യക്ഷനായി.