ബെയ്ജിങ്: ജെയ്‌ഷെ മുഹമ്മദ് തലവന്‍ മസൂദ് അസ്ഹറിനെ യു.എന്നിന്റെ ആഗോള തീവ്രവാദ പട്ടികയില്‍ ഉള്‍പ്പെടുത്തുന്നതില്‍ പുരോഗതിയെന്ന് ചൈന. കരിമ്പട്ടകയില്‍പ്പെടുത്താനായി രക്ഷാസമിതിയെ നേരിട്ട് സമീപിച്ച യു.എസിന്റെ നടപടി അനാവശ്യമാണെന്ന് ചൈനീസ് വിദേശകാര്യ മന്ത്രാലയ വക്താവ് ഗെങ് ഷ്വാങ് പറഞ്ഞു.
മസൂദ് അസഹ്‌റിനെതിരേ ഉപരോധം ഏര്‍പ്പെടുത്താനായി (1267 കമ്മിറ്റി) നേരത്തെ അപേക്ഷ സമര്‍പ്പിച്ചതിന് ശേഷം വിഷയത്തില്‍ വ്യത്യസ്ത വിഭാഗങ്ങളോട് ആശയ വിനിമയം നടത്തി അനുകൂല നിലപാടെടുത്തു. യു.എസിന് ഇക്കാര്യം വ്യക്തമായി അറിയാം. ഈ സാഹചര്യത്തില്‍ പ്രമേയം അവതരിപ്പിക്കാനായി നേരിട്ട് സമീപിച്ചത് ക്രിയാത്മക പ്രവൃത്തിയല്ല.
ഇത് തെറ്റായ മാതൃകയാണ്. പ്രമേയവുമായി നിര്‍ബന്ധിതമായി മുന്നോട്ടുപോകുന്നതിനെ അനുകൂലിക്കുന്നില്ല. വിഷയത്തില്‍ പുരോഗതിക്കായി ചൈന ശ്രമം നടത്തികൊണ്ടിരിക്കുകയാണ്. ഇതിനിടെയുള്ള യു.എസിന്റെ സമീപനം യു.എന്‍ നിയമവും നടപടിക്രമങ്ങളും അനുസരിച്ച് ന്യായീകരിക്കാനാകില്ല. കൂടുതല്‍ സങ്കീര്‍ണമാക്കാനേ ഇത് ഉപകരിക്കുകയുള്ളു. തെക്കന്‍ ഏഷ്യന്‍ മേഖലയില്‍ സമാധാനവും സ്ഥിരതയുമുണ്ടാക്കാന്‍ ഇതിലൂടെ സാധിക്കാത്തതിനാല്‍ ചൈന എതിര്‍ക്കുകയായണെന്ന് അദ്ദേഹം പറഞ്ഞു.

മസൂദ് അസ്ഹറിനെതിരേ രണ്ടാഴ്ച മുന്‍പ് രക്ഷാസമിതിയില്‍ ഫ്രാന്‍സ് അവതരിപ്പിച്ച പ്രമേയം ചൈന വീറ്റോ ചെയ്തിരുന്നു. വിഷയത്തില്‍ കൂടുതല്‍ പഠിക്കണമെന്ന് വ്യക്തമാക്കിയാണ് ചൈന എതിര്‍പ്പ് അറിയിച്ചത്.

പുല്‍വാമ ആക്രമണത്തിന് പിന്നാലെയാണ് മസൂദ് അസ്ഹറിനെതിരേയുള്ള നീക്കം ശക്തമാക്കിയത്.
ജമ്മുകശ്മിരിലെ പുല്‍വാമയില്‍ 40 ജവാന്മാര്‍ കൊല്ലപ്പെട്ട ഭീകരാക്രണത്തിന്റെ ഉത്തരവാദിത്വം ജെയ്‌ഷെ മുഹമ്മദ് ഏറ്റെടുത്തിരുന്നു. കൂടാതെ ആക്രമണവുമായി ബന്ധപ്പെട്ടുള്ള ജെയ്‌ഷെ മുഹമ്മദിന്റെ പങ്കാളിത്വം വ്യക്തമാക്കുന്ന തെളിവുകള്‍ പാകിസ്താന്‍ ആക്ടിങ് ഹൈകമ്മിഷണര്‍ക്ക് ഫെബ്രുവരി 27ന് ഇന്ത്യ കൈമാറിയിരുന്നു. എന്നാല്‍ ഇന്ത്യ കൈമാറിയ തെളിവുകള്‍ പാകിസ്താന്‍ തള്ളിയിരുന്നു.
തെളിവുകളുടെ അടിസ്ഥാനത്തില്‍ അന്വേഷണ കമ്മിറ്റി പരിശോധന നടത്തിയെന്നും എന്നാല്‍ പുല്‍വാമ ആക്രമണത്തിലെ പങ്കാളിത്വത്തിനുള്ള തെളിവുകളൊന്നും കണ്ടെത്തിയില്ലെന്നുമായിരുന്ന പാകിസ്താന്റെ വാദം.