മെക്‌സിക്കോ സിറ്റി: മെക്‌സിക്കോ പടക്ക നിര്‍മാണ ശാലയിലുണ്ടായ സഫോടനത്തില്‍ 24 പേര്‍ മരിച്ചു. 49 പേര്‍ക്ക് പരുക്കേറ്റു. മെക്‌സിക്കോ സിറ്റിക്ക് സമീപമുണ്ടായ ആദ്യ സ്‌ഫോടനത്തില്‍പ്പെട്ടവരെ രക്ഷിക്കാനായി എത്തിച്ചേര്‍ന്നവര്‍ രണ്ടാം സ്‌ഫോടനത്തില്‍പ്പെടുകയായിരുന്നു. തുടരെ നാല് സ്‌ഫോടനങ്ങളാണുണ്ടായത്. മരിച്ചവരില്‍ നാല് പേര്‍ അഗ്നിശമന സേന ഉദ്യോഗസ്ഥരാണ്. ആദ്യ സ്‌ഫോടനത്തില്‍ 17 പേരും രണ്ടാം സ്‌ഫോടനത്തില്‍ ഏഴ് പേരുമാണ് മരിച്ചത്. 

മെക്‌സിക്കോ സിറ്റിക്ക് സമീപം ടുല്‍ട്ടെപെക്കില്‍ ശനിയാഴ്ച രാവിലെയാണ് സ്‌ഫോടനമുണ്ടായത്. നിരവധി പടക്ക നിര്‍മാണ ശാലകളുള്ള സ്ഥലത്താണ് സ്‌ഫോടനം നടന്നത്. ആകാശത്തേക്ക് പൊട്ടിത്തെറിച്ച പടക്കത്തില്‍ നിന്നുള്ള തീപ്പൊരിയാണ് വന്‍ സ്‌ഫോടനത്തിലേക്ക് നയിച്ചത്.
ആദ്യ സ്‌ഫോടനത്തിന് പിന്നാലെ അഗ്നി ശമന സേനയും രക്ഷാ പ്രവര്‍ത്തകരും എത്തിച്ചേര്‍ന്നു. തുടര്‍ന്നാണ് മൂന്ന് സ്‌ഫോടനങ്ങളുമുണ്ടായത്. പരുക്കേറ്റവരെ ഹെലികോപ്റ്ററുകളില്‍ വിവിധ ആശുപത്രികളില്‍ പ്രവേശിപ്പിച്ചു. പ്രദേശത്ത് അനധികൃത പടക്ക നിര്‍മാണം വ്യാപകമായിട്ടും അധികൃതര്‍ നടപടിയെക്കുന്നില്ലെന്ന പരാതിയുണ്ട്.
കഴിഞ്ഞ മാസം പടക്ക നിര്‍മാണ ശാലയിലുണ്ടായ സ്‌ഫോടനത്തില്‍ ഏഴ് പേര്‍ മരിച്ചിരുന്നു. 2016 ഡിസംബറിലുണ്ടായ സ്‌ഫോടനത്തില്‍ 34 പേര്‍ കൊല്ലപ്പെട്ടിരുന്നു.