പാരിസ്: സെന്‍ട്രല്‍ പാരീസിലെ ചാംപ്‌സ് എലീസിലുള്ള വ്യാപാരമേഖലയില്‍ വെടിവയ്പ്പില്‍ പൊലിസുകാരന്‍ കൊല്ലപ്പെട്ട സംഭവത്തില്‍ ആക്രമണത്തിന്റെ ഉത്തരവാദിത്തം ഐ.എസ് ഏറ്റെടുത്തു. തങ്ങളുടെ പോരാളിയാണ് ആക്രമണം നടത്തിയതെന്ന് ഐ.എസ് അറിയിച്ചു.

വെടിവയ്പ്പില്‍ രണ്ടു പേര്‍ക്ക് ഗുരുതരമായി പരുക്കേറ്റിരുന്നു. ആക്രമിയെ തിരിച്ചറിഞ്ഞെങ്കിലും ഇക്കാര്യം വെളിപ്പെടുത്താനാകില്ലെന്ന് പാരിസ് പ്രോസിക്യൂട്ടര്‍ ഫ്രാന്‍കോയിസ് മോലിന്‍സ് പറഞ്ഞു. ആക്രമണം നടത്തിയത് തങ്ങളുടെ പോരാളിയെന്ന് ഐ.എസ് അറിയിച്ചു.

ഭീകരാക്രമണമാണ് നടന്നതെന്ന് ഫ്രഞ്ച് പ്രസിഡന്റ് ഫ്രാന്‍സ്വ ഒലന്ദ്വ പറഞ്ഞു. സംഭവത്തെ കുറിച്ച് ചര്‍ച്ച ചെയ്യാന്‍ മന്ത്രിസഭാ യോഗം ചേരുമെന്നും അദ്ദേഹം പറഞ്ഞു. മുന്‍കരുതല്‍ നടപടിയുടെ ഭാഗമായി ജനങ്ങളോട് പ്രദേശം ഒഴിയാന്‍ പാരിസ് പൊലിസ് നിര്‍ദേശം നല്‍കിയിട്ടുണ്ട്.