ചെന്നൈ: തമിഴ് സിനിമാ താരം ധനുഷ് തങ്ങളുടെ മകനാണെന്ന അവകാശവാദവുമായി രംഗത്തെത്തിയ വൃദ്ധദമ്പതികളുടെ ഹരജി കോടതി തള്ളി. മദ്രാസ് ഹൈക്കോടതിയാണ് ഹരജി തള്ളിയത്. മധുരയിലെ മാലംപട്ടിയിലുള്ള കതിരേശന്‍-മീനാക്ഷി ദമ്പതികളാണ് ധനുഷ് തങ്ങളുടെ മകനാണെന്ന് അവകാശവാദമുന്നയിച്ച് ഹരജി സമര്‍പ്പിച്ചത്.

ധനുഷ് തങ്ങളുടെ മകനാണെന്ന് തെളിയിക്കാനുള്ള രേഖകള്‍ തങ്ങളുടെ കൈവശം ഉണ്ടെന്നും ആവശ്യമെങ്കില്‍ ഡി.എന്‍.എ ടെസ്റ്റ് നടത്താന്‍ തയ്യാറാണെന്നും ദമ്പതികള്‍ കോടതിയെ നേരത്തെ അറിയിച്ചിരുന്നു.

എന്നാല്‍, ഇവര്‍ സമര്‍പ്പിച്ച രേഖകളിലെ അടയാളങ്ങള്‍ ധനുഷിന്റെ ശരീരത്തിലില്ലെന്ന് ധനുഷിനെ പരിശോധിച്ച ഡോക്ടര്‍മാര്‍ റിപ്പോര്‍ട്ട് നല്‍കിയിരുന്നു. ഇതിന്റെ അടിസ്ഥാനത്തിലാണ് കോടതി ഹരജി തള്ളിയത്. ഡി.എന്‍.എ ടെസ്റ്റിന് താന്‍ തയ്യാറല്ലെന്നും ധനുഷ് കോടതിയെ അറിയിച്ചിരുന്നു.