കണ്ണൂര്‍: കൊവിഡ് ബാധിച്ച് മരിച്ച എക്സൈസ് ഉദ്യോഗസ്ഥന്‍ കെ. പി സുനിലിന്റെ ചികിത്സിച്ചതില്‍ വീഴ്ചയെന്ന് സഹോദരന്‍. ആശുപത്രിക്കെതിരെ ആരോപണമുന്നയിച്ച സഹോദരന്‍ അന്വേഷണം ആവശ്യപ്പെട്ട് മുഖ്യമന്ത്രിക്ക് പരാതി നല്‍കി.പട്ടിക ജാതി-വര്‍ഗ കമ്മീഷന്‍ ചെയര്‍മാന്‍ ജില്ലാ മെഡിക്കല്‍ ഓഫീസര്‍ എന്നിവര്‍ക്കും പരാതി നല്‍കി.

ജൂണ്‍ 14 മുതല്‍ 16 വരെ പരിയാരം മെഡിക്കല്‍ കോളജില്‍ ചികിത്സയിലുണ്ടായിരുന്ന സുനിലിന് ചികിത്സയൊന്നും തന്നെ നല്‍കിയില്ലെന്ന് സഹോദരന്‍ പരാതിയില്‍ ആരോപിക്കുന്നു.നേരത്തെയും മതിയായ ചികിത്സയും പരിചരണവും സുനിലിന് ലഭിച്ചില്ലെന്ന് കുടുംബം പറഞ്ഞിരുന്നു. ഇതിന് പിന്നാലെയാണ് പരാതി നല്‍കിയിരിക്കുന്നത്. ആശുപത്രിയില്‍ നിന്നും ചികിത്സ ലഭിക്കുന്നില്ലെന്ന് സുനില്‍ കുടുംബത്തോട് ഫോണ്‍ ചെയ്ത റെക്കോര്‍ഡ് നേരത്തെ കുടുംബം പുറത്തു വിട്ടിരുന്നു.

അതേസമയം കുടുംബം ഉന്നയിച്ച ആരോപണം മെഡിക്കല്‍ കോളജ് അധികൃതര്‍ നിഷേധിച്ചു. ആശുപത്രിയിലെത്തുമ്പോള്‍ തന്നെ കടുത്ത ന്യൂമോണിയ ബാധിച്ച് ശ്വാസ കോശ പ്രവര്‍ത്തനത്തെ സാരമായി ബാധിച്ചിരുന്നു എന്നാണ് കോളജ് പ്രിന്‍സിപ്പല്‍ പറഞ്ഞത്.