പറവൂര്‍: നരേന്ദ്രമോദിയും പിണറായി വിജയനും ജനദ്രോഹ നടപടികളില്‍ മത്സരിക്കുന്നുവെന്ന് മുന്‍ കെ.പി.സി.സി പ്രസിഡന്റ് വി.എം സുധീരന്‍. യു.ഡി.എഫ് സ്ഥാനാര്‍ഥി ഹൈബി ഈഡന്റെ മണ്ഡല പര്യടനം പറവൂരില്‍ ഉദ്്ഘാടനം ചെയ്യുകയായിരുന്നു അദ്ദേഹം.
ജി.എസ്.ടിയും നോട്ട് നിരോധനവും രാജ്യത്തെ സാധാരണ ജനങ്ങളുടെ ജീവിതം ദുസഹമാക്കി. കോര്‍പറേറ്റുകള്‍ക്കായി മൂന്നര ലക്ഷം കോടി രൂപയുടെ കടം കേന്ദ്രസര്‍ക്കാര്‍ എഴുതിത്തള്ളി. രാജ്യത്തെ കോടതികളും റിസര്‍വ് ബാങ്കും ഉള്‍പ്പെടെയുള്ള ഭരണഘടനാ സ്ഥാപനങ്ങളെ ചവിട്ടിമെതിച്ചു. ജാതിയുടെയും മതത്തിന്റെയും പേരില്‍ രാജ്യത്തെ ശിഥിലീകരിക്കാന്‍ ബി.ജെ.പി രാജ്യത്ത് നടത്തിയ ആസൂത്രിത ശ്രമങ്ങളുടെ അതേ പാതയാണ് ശബരിമലയില്‍ അയ്യപ്പഭക്തരുടെ വികാരങ്ങളെ ഫാസിസ്റ്റ് ശൈലില്‍ ചവിട്ടിമെതിച്ച പിണറായി സര്‍ക്കാരും കേരളത്തില്‍ നടപ്പിലാക്കുന്നതെന്ന് വി.എം സുധീരന്‍ പറഞ്ഞു.
കേരളത്തിലെ സി.പി.എം ഉള്‍പ്പെടെയുള്ള ഇടതുപക്ഷ പ്രസ്ഥാനങ്ങള്‍ ബി.ജെ.പിയുടെ ബി ടീം ആയി പ്രവര്‍ത്തിക്കുന്നു. വര്‍ഗീയ ഫാസിസ്റ്റ് സമീപനം സ്വീകരിക്കുന്ന ബി.ജെ.പിയെ അധികാരത്തില്‍ നിന്ന് പുറംതള്ളണമെങ്കില്‍ രാജ്യത്ത് കോണ്‍ഗ്രസ്സിന് മാത്രമേ സാധിക്കു. ഈ സാഹചര്യത്തില്‍ കേന്ദ്രത്തില്‍ കോണ്‍ഗ്രസിനെ പിന്തുണക്കുവാന്‍ കേരളത്തില്‍ വോട്ടുചോദിക്കുന്ന സി.പി.എമ്മിന്റെ ഇരട്ടത്താപ്പ് കേരള സമൂഹം മനസിലാക്കുമെന്നും അദ്ദേഹം കൂട്ടിച്ചേര്‍ത്തു.
പറവൂര്‍ നിയോജക മണ്ഡലം യു.ഡി.എഫ് കണ്‍വീനര്‍ അഗസ്റ്റിന്‍ അധ്യക്ഷതനായി. സ്ഥാനാര്‍ഥി ഹൈബി ഈഡന്‍, കെ.വി തോമസ്, വിഡി സതീശന്‍ എം.എല്‍.എ, കെ.പി.സി.സി സെക്രട്ടറി വത്സല പ്രസന്നകുമാര്‍, ഡി.സി.സി പ്രസിഡന്റ് ടി.ജെ വിനോദ്, കെ.പി ധനപാലന്‍, കെ.ബാബു, അജയ് തറയില്‍, കെ.എസ്.യു സംസ്ഥാന പ്രസിഡന്റ് അഭിജിത് തുടങ്ങിയവര്‍ സംസാരിച്ചു.