കാക്കനാട്: എറണാകുളം പാര്‍ലമെന്റ് മണ്ഡലത്തിലെ യു.ഡി.എഫ് സ്ഥാനാര്‍ഥി ഹൈബി ഈഡന് 17.09 ലക്ഷം രൂപയുടെയും ഭാര്യ അന്ന ലിന്‍ഡ ഈഡന് 14.03 ലക്ഷം രൂപയുടെയും സ്ഥാവര സ്വത്തുക്കള്‍.  നാമനിര്‍ദേശ പത്രികയോടൊപ്പം നല്‍കിയ സത്യവാങ്മൂലത്തിലാണ് സ്വത്ത് വിവരങ്ങള്‍ രേഖപ്പെടുത്തിയിരിക്കുന്നത്.ഹൈബിക്ക് 15.06 ലക്ഷം രൂപയുടെ ബാങ്ക് ഡെപ്പോസിറ്റും സൗഖ്യം ചാരിറ്റബിള്‍ ട്രസ്റ്റിന്റെ ഭാഗമായി ഡോ. ജുനൈദ് റഹ്മാനുമായി ചേര്‍ന്നുള്ള സംയുക്ത അക്കൗണ്ടില്‍ 37.03 ലക്ഷം രൂപയുമുണ്ട്.
സ്വയം ആര്‍ജിച്ച സ്വത്തുക്കള്‍ ഇല്ലാത്ത ഹൈബിക്ക് പരമ്പരാഗതമായി ലഭിച്ച സ്വത്തിന്റെ മൂല്യം 32 ലക്ഷം രൂപയാണ്.വിവിധ ബാങ്കുകളിലായി 18.01 ലക്ഷം രൂപയുടെ നിക്ഷേപമുള്ള ഭാര്യക്ക് 15.50 ലക്ഷത്തിന്റെ ജംഗമ സ്വത്തുമാണുള്ളത്. ഹൈബിക്ക് സ്വന്തമായി 23000 രൂപയുടെയും,ഭാര്യക്ക് 39.40 ലക്ഷം രൂപയുടെയും, മകള്‍ ക്ലാര അന്ന ഈഡന് 46000 രൂപയുടെയും മൂല്യം വരുന്ന സ്വര്‍ണാഭരണങ്ങള്‍ ഉണ്ട്.
ഹൈബിക്ക് 15 ലക്ഷം രൂപയുടെ എല്‍.ഐ.സി പോളിസിയും 6.26 ലക്ഷം രൂപ വില മതിക്കുന്ന 2011 മോഡല്‍ ടൊയോട്ട ഇന്നോവ കാറുമുണ്ട്. നിയമവിരുദ്ധമായി സംഘം ചേരല്‍, ട്രാഫിക് നിയമ ലംഘനം എന്നിവ ഉള്‍പ്പെടെ സ്ഥാനാര്‍ത്ഥിക്ക് എതിരായി ആറുകേസുകളും ഉണ്ട്.