ഈരാറ്റുപേട്ട: ആളൊഴിഞ്ഞ വീട് കേന്ദ്രീകരിച്ച് ബോങ് എന്ന ഉപകരണത്തിന്റെ സഹായത്തോടെ ഹാഷിഷ് ഓയിലടക്കം ഉപയോഗിക്കുകയായിരുന്ന പ്രൊഫഷണല്‍ കോഴ്‌സ് പഠിതാക്കളായ വിദ്യാര്‍ഥി സംഘത്തെ ഈരാറ്റുപേട്ട എക്‌സൈസ് അറസ്റ്റ് ചെയ്തു. പൊന്‍കുന്നം സ്വദേശി കെല്‍വിന്‍, ആനിക്കാട് സ്വദേശികളായ ജോണ്‍സണ്‍, റിജില്‍ ഐസക്ക്, കോതമംഗലം സ്വദേശി അല്‍ത്താഫ്, മല്ലപ്പള്ളി സ്വദേശി ടോംസ് എന്നിവരാണ് പിടിയിലായത്.
ചിറ്റാനപ്പാറ ഭാഗത്തുവച്ച് വിദ്യാര്‍ത്ഥികള്‍ ഉള്‍പ്പെടെയുള്ള ചെറുപ്പക്കാര്‍ക്ക് വില്‍പന നടത്തുവാനായി കൊണ്ടുവന്ന 10 ഗ്രാം കഞ്ചാവുമായി മുണ്ടക്കയം സ്വദേശി അഖില്‍ പിടിയിലായതോടെയാണ് കൂടുതല്‍ വിവരങ്ങള്‍ ലഭിച്ചത്. പാലാ റെയിഞ്ചില്‍പ്പെട്ട ചൂണ്ടച്ചേരി വേഴങ്ങാനം ഭാഗത്ത് ഒറ്റപ്പെട്ട വീടുകള്‍ കേന്ദ്രീകരിച്ച് കഞ്ചാവ് ഉള്‍പ്പെടെയുള്ള മയക്കുമരുന്നുകള്‍ ഉപയോഗിക്കുന്നതായി അഖിലില്‍നിന്നും വിവരം ലഭിച്ചു.
തുടര്‍ന്ന് പാലാ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ബൈജുവും, പാലാ റെയിഞ്ച് ഇന്‍സ്‌പെക്ടര്‍ കെ.ബി ബിനുവും സംഘവും ചേര്‍ന്ന് വേഴങ്ങാനം ഭാഗത്ത് ആളൊഴിഞ്ഞ പറമ്പിലെ ഒറ്റപ്പെട്ട വീട്ടില്‍നിന്നും ലഹരി ഉപയോഗിക്കുകയായിരുന്ന സംഘത്തെ പിടികൂടുകയായിരുന്നു.
ബോങ് എന്ന വസ്തു ഉപയോഗിച്ചാണ് സംഘം ലഹരി ഉപയോഗിച്ചത്. 30 ഗ്രാം ഹാഷിഷ് ഓയിലും കണ്ടെടുത്തു. പ്രൊഫഷണല്‍ കോഴ്‌സുകള്‍ക്ക് പഠിക്കുന്ന കുട്ടികള്‍, പരീക്ഷാകാലങ്ങളില്‍ കഞ്ചാവ് പോലുള്ള മയക്കുമരുന്നുകള്‍ ഉപയോഗിച്ചാല്‍ ഓര്‍മശക്തി, ബുദ്ധിശക്തി, ആത്മവിശ്വാസം എന്നിവ വര്‍ധിക്കുമെന്ന മിഥ്യധാരണയോടെയാണ് ലഹരി ഉപയോഗം നടത്തുന്നതെന്ന് എക്‌സൈസ് സംഘം പറഞ്ഞു. വിദ്യാര്‍ഥികളുടെ മാതാപിതാക്കള്‍ പരീക്ഷാകാലങ്ങളിലും അല്ലാതെയും വിദ്യാര്‍ഥികള്‍ കൂട്ടുകാരുടെകൂടെ വീടുകള്‍ എടുത്ത് താമസിക്കുന്നുണ്ടെങ്കില്‍ പ്രത്യേക നിരീക്ഷണവും കരുതലും വേണമെന്നും എക്‌സൈസ് ഉദ്യോഗസ്ഥര്‍ അറിയിച്ചു.
പരിശോധനകള്‍ക്ക് ഈരാറ്റുപേട്ട റെയിഞ്ച് എക്‌സൈസ് ഇന്‍സ്‌പെക്ടര്‍ അല്‍ഫോണ്‍സ് ജേക്കബ്ബ്, അസി. എക്‌സൈസ് ഇന്‍സ്‌പെക്ടര്‍മാരായ അനില്‍കുമാര്‍, രാഹുല്‍രാജ്, പ്രിവന്റീവ് ഓഫിസര്‍മാരായ അനീഷ്‌കുമാര്‍, ജയ്‌സണ്‍ ജേക്കബ്ബ്, അഭിലാഷ്, അനില്‍ വേലായുധന്‍, സിവില്‍ എക്‌സൈസ് ഓഫിസര്‍മാരായ അനുരാജ്, രാഹുല്‍ നാരായണന്‍, പ്രസാദ്, ഉണ്ണിമോന്‍, നൗഫല്‍, സ്റ്റാന്‍ലി, നന്ദു, അഭിലാഷ്, ജോബി, വിനീതാ, പാര്‍വ്വതി, സിബി, ഡ്രൈവര്‍ സന്തോഷ് നേതൃത്വം നല്‍കി.