ജിദ്ദ: ഇപ്പോള്‍ മുസ്ലീംലീഗ് സെക്കുലറായിയെന്നും ലീഗിന്റെ പ്രവര്‍ത്തനങ്ങളും പ്രസംഗങ്ങളും പ്രതീക്ഷ പകരുന്നതാണെന്നും മുന്‍ മന്ത്രിയും മുതിര്‍ന്ന കോണ്‍ഗ്രസ് നേതാവുമായ ആര്യാടന്‍ മുഹമ്മദ്. ഇപ്പോള്‍ ഞങ്ങള്‍ തമ്മില്‍ നല്ല ബന്ധമാണെന്നും അദ്ദേഹം പറഞ്ഞു. ജിദ്ദയില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം. 

തെരഞ്ഞെടുപ്പ് വിജയത്തെയും പരാജയത്തെയും മതനേതാക്കള്‍ സ്വാധീനിക്കുന്ന പ്രവണത ശരിയല്ല. സി.പി.എമ്മിന് ദേശീയ രാഷ്ട്രീയത്തില്‍ ഒന്നുംെചയ്യാന്‍ സാധിക്കില്ല. മലപ്പുറത്തിന്റെ ഉള്ളടക്കം വര്‍ഗീയമാണെന്ന മന്ത്രി കടകംപള്ളി സുരേന്ദ്രന്റെ പ്രസ്താവനയെ സംബന്ധിച്ച ചോദ്യത്തിന് ആര്യാടന്റെ മറുപടി പറയുകയായിരുന്നു അദ്ദേഹം. മലപ്പുറത്ത് വര്‍ഗീയ കക്ഷിയായ പി.ഡി.പിയുടെ വോട്ട് വാങ്ങിയത് സി.പി.എമ്മാണ്.
മുന്നാര്‍ കൈയേറ്റം ഒഴിപ്പിക്കുന്നതിന്റെ ഭാഗമായി കുരിശ് പൊളിച്ചു മാറ്റിയ രീതി ശരിയായില്ല. പ്രായോഗികമായ രീതിയിലല്ല നീക്കം ചെയ്തതെന്നും അദ്ദേഹം പറഞ്ഞു.
മക്കയില്‍ സന്ദര്‍ശിക്കുന്നുണ്ടെന്നും അദ്ദേഹം ചോദ്യത്തിന് മറുപടിയായി പറഞ്ഞു. എന്നാല്‍ മദീനയില്‍ പോകുന്നതിനെ കുറിച്ച് തീരുമാനിച്ചിട്ടില്ല. പല പുണ്യകേന്ദ്രങ്ങളിലും താന്‍ സന്ദര്‍ശനം നടത്തിയിട്ടുണ്ട്. നമസ്‌കാരവും ഉംറയും ഒക്കെ നിര്‍വഹിക്കുന്നത് പത്രത്തില്‍ വന്നാല്‍ അതിന്റെ കൂലി നഷ്ടപ്പെടില്ലേ എന്നായിരുന്നു ഉംറക്കു പോകുന്നുണ്ടോ എന്ന ചോദ്യത്തോട് അദ്ദേഹത്തിന്റെ പ്രതികരണം.