ആറ്റിങ്ങല്‍: മോഷണശ്രമവുമായി ബന്ധപ്പെട്ട് കടയ്ക്കാവൂര്‍ പൊലിസ് പിടികൂടിയ പ്രതി ഒരു കൈയില്‍ വിലങ്ങുമായി രക്ഷപ്പെട്ടു.  പൊലിസ് നടത്തിയ തിരച്ചിലില്‍  വീണ്ടും പിടികൂടി. കടയ്ക്കാവൂര്‍ തെക്കുംഭാഗം വിഷ്ണു നിവാസില്‍ വിഷ്ണു വി തുളസിയാണ് പൊലിസ് കസ്റ്റഡിയില്‍ നിന്നും രക്ഷപ്പെടുകയും വീണ്ടും പിടിയിലാവുകയും ചെയ്തത്.
സംഭവത്തെക്കുറിച്ച്  പൊലിസ് പറയുന്നത്.  ഇക്കഴിഞ്ഞ ദിവസം രാത്രി കടയ്ക്കാവൂര്‍ തെക്കുംഭാഗത്തെ ഒരു വീട്ടിലെ കുളിമുറിയില്‍ ഒളിച്ചിരിക്കുകയായിരുന്ന വിഷ്ണുവിനെ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചിരുന്നു.
കസ്റ്റഡിയിലായ വിഷ്ണു  രാവിലെ അഞ്ചു മണിക്ക് പ്രാഥമിക കൃത്യത്തിന് പോകണമെന്ന് ഡ്യൂട്ടിയിലുണ്ടായിരുന്ന പൊലീസുകാരനോടാവശ്യപ്പെട്ടു. വിലങ്ങഴിക്കുന്നതിനിടെ പൊലിസുകാരനെ മര്‍ദിച്ച ശേഷം ഓടി രക്ഷപ്പെടുകയായിരുന്നു.  തുടര്‍ന്ന് പൊലിസ് സംഘം നടത്തിയ വ്യാപക തിരച്ചിലില്‍ മുടപുരം ശിവ കൃഷ്ണപുരത്തു നിന്നാണ്  വീണ്ടും പിടികൂടിയത്.