മാച്ചേരി: മാച്ചേരി അയ്യപ്പന്‍മലയില്‍ വീടിന് തീപിടിച്ചു. മിനി പ്രഭയില്‍ വിനോദ് കുമാറിന്റെ വീടാണ് അഗ്നിക്കിരിയായത്. ഇന്നലെ രാവിലെ രണ്ടാം നിലയിലെ മുറിയില്‍ നിന്ന് പുക ഉയരുന്നത് കണ്ട അയല്‍വാസികളാണ് ഇക്കാര്യം വീട്ടുകാരെ അറിയിച്ചത്. നിമിഷ നേരം കൊണ്ട് തീപടരുകയും ചെയ്തു. അഗ്നിബാധയില്‍ മേല്‍ക്കൂര മുഴുവനായും കത്തി നശിച്ചു. അടുത്ത കാലത്ത് പുതുക്കി പണിത വീടാണിത്. വീട്ടിലുണ്ടായിരുന്ന പുസ്തകങ്ങളും ഫര്‍ണിച്ചറുകളും വീട്ടുപകരണങ്ങളും കത്തി നശിച്ചു. പത്തുലക്ഷത്തോളം രൂപയുടെ നഷ്ടമുണ്ടായി. നാട്ടുകാരും ഫയര്‍ഫോഴ്‌സും ചേര്‍ന്ന് തീ അണച്ചു. വീട്ടിലുണ്ടായിരുന്നവര്‍ പുറത്തേക്ക് രക്ഷപ്പെട്ടതിനാല്‍ അപകടം ഒഴിവായി. ഷോര്‍ട്ട് സര്‍ക്ക്യൂട്ടാണ് കാരണമെന്ന് സംശയിക്കുന്നു.