മുക്കം: വിദ്യാര്‍ഥികളെ കയറ്റാത്ത സ്വകാര്യ ബസുകള്‍ക്കെതിരേ മുക്കം പൊലിസ് നടപടി തുടങ്ങി. വിദ്യാര്‍ഥികളില്‍ നിന്നും രക്ഷിതാക്കളില്‍ നിന്നും വ്യാപകമായ പരാതികള്‍ ഉയര്‍ന്നതിനെ തുടര്‍ന്നാണ് പൊലിസ് നടപടി കര്‍ശനമാക്കിയത്. ഇതിന്റെ ഭാഗമായി ഇന്നലെ മുക്കം- താമരശേരി റൂട്ടില്‍ ഓടുന്ന സ്വാകാര്യ ബസ് മുക്കം പൊലിസ് കസ്റ്റഡിയിലെടുത്തു. ഇന്നലെ വൈകുന്നേരം 4.30ന് മുക്കം ബസ് സ്റ്റാന്റില്‍ ആണ് സംഭവം.
ഏതാനും വിദ്യാര്‍ഥിനികളെ ബസില്‍ കയറ്റുന്നില്ലെന്ന പരാതിയെ തുടര്‍ന്ന് മുക്കം എസ്.ഐ കെ.പി അഭിലാഷിന്റെ നേതൃത്വത്തിലുള്ള പൊലിസ് സംഘമെത്തി ബസ് കസ്റ്റഡിയിലെടുക്കുകയായിരുന്നു. വിദ്യാര്‍ഥിനികള്‍ ബസില്‍ കയറാന്‍ ശ്രമിച്ചെങ്കിലും ജീവനക്കാര്‍ അനുവദിക്കാത്തതിനെ തുടര്‍ന്ന് ബസ് സ്റ്റാന്റില്‍ ഡ്യൂട്ടിയിലായിരുന്ന ഹോംഗാര്‍ഡിനോട് വിദ്യാര്‍ഥിനികള്‍ പരാതിപ്പെടുകയായിരുന്നു. ഇദ്ദേഹം വിവരമറിയിച്ചതിനുസരിച്ച് മുക്കം പൊലിസ് ബസ് സ്റ്റാന്‍ഡിലെത്തി ബസ് കസ്റ്റഡിയിലെടുക്കുകയായിരുന്നു. മുക്കം പുല്‍പ്പറമ്പ് മണാശ്ശേരി റൂട്ടിലോടുന്ന മറ്റൊരു ബസിനെ താക്കീത് ചെയ്തു വിടുകയും ചെയ്തു. ബസ് ജീവനക്കാര്‍ വിദ്യാര്‍ഥികളോട് അപമര്യാദയായി പെരുമാറുന്നതായുള്ള പരാതികളും ഉയര്‍ന്നിട്ടുണ്ട്. വരും ദിവസങ്ങളിലും നടപടികള്‍ കര്‍ശനമാക്കുമെന്ന് പൊലിസ് അറിയിച്ചു.