മലപ്പുറം: നക്‌സലൈറ്റ് പ്രസ്ഥാനത്തില്‍നിന്ന് കേരളത്തെ ശക്തമായി നിലനിര്‍ത്തിയത് കെ.കരുണാകരനായിരുന്നുവെന്നു എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടി. മലപ്പുറം ഡി.സി.സി ഓഫിസില്‍ കെ.കരുണാകരന്‍ ജന്മശദാബ്ദി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിലും പശ്ചിമബംഗാളുമായിരുന്നു നക്‌സലൈറ്റ് പ്രസ്ഥാനം രംഗത്തുണ്ടായിരുന്നത്.
പശ്ചിമബംഗാള്‍ അന്താളിച്ചു നിന്നപ്പോള്‍ കേരളം ഇച്ഛാശക്തിയോടെ ഭരണരംഗത്തും രാഷ്ട്രീയ രംഗത്തും നിലകൊണ്ടു നക്‌സല്‍ പ്രസ്ഥാനത്തില്‍ നിന്നും മോചിപ്പിക്കുകയായിരുന്നു.
സപ്തമുന്നണികാലത്ത് കേവലം അഞ്ചു സീറ്റുണ്ടായിരുന്ന പരാജയപ്പെട്ട കോണ്‍ഗ്രസിനെ പത്തുവര്‍ഷം കൊണ്ടു 111 സീറ്റുനേടി യു.ഡി.എഫിന്റെ വിജയത്തിലെത്തിച്ചത് കരുണാകരനാണ്.തോല്‍പിച്ചവരോട് പ്രതികാരം കാണിച്ചല്ല,തെറ്റുകള്‍ ഏറ്റുപറഞ്ഞു തിരുത്തിയാണ് കോണ്‍ഗ്രസ് മുന്നേറിയതെന്നും അദ്ദേഹം പറഞ്ഞു.
ഡി.സി.സി പ്രസിഡന്റ് വി.വി പ്രകാശ് അധ്യക്ഷനായി. എ.പി അനില്‍കുമാര്‍ എം.എല്‍.എ, കെ.പി.സി.സി സെക്രട്ടറി കെ.പി അബ്ദുല്‍മജീദ്,അജയ്കുമാര്‍,വി.എ കരീം,സെയ്ദ് മുഹമ്മദ് തങ്ങള്‍, ഫാത്തിമ റോഷ്‌നി, ഡോ. എം. ഹരിപ്രിയ, ഇ.മുഹമ്മദ് കുഞ്ഞി, പി.പി.ഹംസ എന്നിവര്‍ സംസാരിച്ചു.